ஜப்பானில் நடைபெறும் 20-வது ஆசிய விளையாட்டில் குத்துச்சண்டையில் இந்தியாவுக்கு 3 தங்கப் பதக்கங்கள் குவிந்தன. 2014-க்குப் பிறகு மகளிர் குத்துச்சண்டையில் தங்கம் வென்று லவ்லினா வரலாற்றுச் சாதனை படைத்துளள்ளார்.

ஜப்பானின் அய்ச்சி - நகோயா நகரில் நடைபெற்று வரும் 20-வது ஆசிய விளையாட்டுப் போட்டியில், இந்தியக் குத்துச்சண்டை வீரர்கள் ஒரே நாளில் 3 தங்கப் பதக்கங்களை வென்று அபார சாதனை படைத்துள்ளனர்.

குத்துச்சண்டையில் 3 தங்கப் பதக்கங்கள்:

லவ்லினா வரலாற்றுத் தங்கம் (75 கிலோ பிரிவு):

மகளிருக்கான 75 கிலோ எடைப்பிரிவு இறுதிப்போட்டியில், தனது 29-வது பிறந்தநாளைக் கொண்டாடிய இந்திய வீராங்கனை லவ்லினா, சீனாவின் ஜியி பாவோவை எதிர்கொண்டார். ஆரம்பம் முதலே ஆதிக்கம் செலுத்திய லவ்லினா 5-0 என்ற கணக்கில் சீன வீராங்கனையை வீழ்த்தி தங்கம் வென்றார். 2014-ல் மேரி கோம் தங்கம் வென்றதற்குப் பிறகு, ஆசிய விளையாட்டு குத்துச்சண்டையில் இந்தியா பெறும் முதல் தங்கம் இதுவாகும்.

பர்வீன் 'த்ரில்' வெற்றி (65 கிலோ பிரிவு):

மகளிருக்கான 65 கிலோ பிரிவு இறுதிப்போட்டியில் இந்தியாவின் பர்வீன் ஹூடா (26), சீன தைபேவின் நியன் சினை எதிர்கொண்டார். பரபரப்பாக நடைபெற்ற இந்த மோதலில் 3-2 என்ற கணக்கில் பர்வீன் த்ரில் வெற்றி பெற்று தங்கப் பதக்கத்தைக் கைப்பற்றினார்.

அன்குஷ் அபாரம் (80 கிலோ பிரிவு):

ஆண்களுக்கான 80 கிலோ பிரிவு இறுதிப்போட்டியில் இந்தியாவின் அன்குஷ் பங்கல் (21), தென்கொரியாவின் கிம் மின்சியாங்கை எதிர்கொண்டார். ஆரம்பம் முதலே அதிரடி காட்டிய அன்குஷ் 4-0 என்ற கணக்கில் வெற்றி பெற்று இந்தியாவிற்கு 3-வது தங்கத்தைப் பெற்றுத் தந்தார்.

படகுப் போட்டியில் நேத்ரா குமணன் வெண்கலம்:

மகளிருக்கான படகுப் போட்டி (Sailing) இறுதிச் சுற்றில் தமிழகத்தைச் சேர்ந்த நேத்ரா குமணன் (29) 14 புள்ளிகளுடன் 3-வது இடம் பிடித்து வெண்கலப் பதக்கம் வென்றார். ஆசிய விளையாட்டில் இவர் வெல்லும் முதல் பதக்கம் இதுவாகும். ஆண்களுக்கான பிரிவில் தமிழகத்தின் விஷ்ணு சரவணன் 4-வது இடம் பிடித்தார்.

செபக்தக்ரா போட்டியில் பதக்கம்:

ஆண்கள் அணிகளுக்கான (4 பேர்) செபக்தக்ரா போட்டியின் அரையிறுதியில் ஜப்பானிடம் தோல்வியடைந்த போதிலும், இந்திய அணிக்கு வெண்கலப் பதக்கம் கிடைத்தது. ஆசிய விளையாட்டுச் செபக்தக்ரா ஆண்கள் பிரிவில் இந்தியா வெல்லும் முதல் பதக்கம் இது என்பது குறிப்பிடத்தக்கது.

நிறைவு விழாவில் கொடியேந்தும் நீரு தண்டா:

ஆசிய விளையாட்டுப் போட்டியின் நிறைவு விழா நாளை நடைபெறவுள்ள நிலையில், இந்திய மூவர்ணக் கொடியை ஏந்திச் செல்லும் கௌரவத்தை 3 பதக்கங்களை (2 தங்கம், 1 வெள்ளி) வென்ற துப்பாக்கிச் சுடுதல் வீராங்கனை நீரு தண்டா பெறுகிறார்.