யு.பி.ஐ. பரிவர்த்தனைகளுக்கு அறிமுகப்படுத்தப்பட்டுள்ள புதிய எம்.டி.ஆர். கட்டணம் என்பது வரியோ அல்லது கூடுதல் கட்டணமோ அல்ல என்றும், இக் கட்டண வசூல் மத்திய அரசுக்கு வராது என்றும் மத்திய நிதி அமைச்சர் நிர்மலா சீதாராமன் விளக்கம் அளித்துள்ளார்.

யு.பி.ஐ. சேவையை நடத்தும் இந்திய தேசிய பணப்பரிவர்த்தனை கழகம் (NPCI), யு.பி.ஐ. மூலம் பணம் பெறும் வணிகர்களுக்கு வரும் அக்டோபர் 15-ஆம் தேதி முதல் எம்.டி.ஆர். (Merchant Discount Rate) கட்டணத்தை அறிமுகப்படுத்தி சுற்றறிக்கை வெளியிட்டுள்ளது.

ரூ.2 ஆயிரத்துக்கு மேல் யு.பி.ஐ. மூலம் பணம் பெறும் வணிகர்கள் 0.4 சதவீத கட்டணம் செலுத்த வேண்டும். ரூ.75 ஆயிரம் அல்லது அதற்கு மேல் பெறும்போது உச்சவரம்பாக ரூ.300 கட்டணம் வசூலிக்கப்படும்.

ரயில்வே, தொலைத்தொடர்பு, எரிபொருள், காப்பீடு போன்ற அத்தியாவசிய சேவைகளுக்கு ரூ.2 ஆயிரத்துக்கு மேல் கட்டணம் செலுத்தும்போது ரூ.5 என்ற நிலையான கட்டணமே வசூலிக்கப்படும்.

பரஸ்பர நிதி மற்றும் பங்குச்சந்தை தொடர்பான பரிவர்த்தனைகளுக்கான கட்டணம் 0.02 சதவீதமாக இருக்கும்.

சிறுகடை உரிமையாளர்கள் விலக்கு: மாதத்திற்கு ரூ.1 லட்சம் வரை யு.பி.ஐ. கியூ.ஆர் (QR) கோடு மூலம் பணம் பெறும் சிறு வணிகர்களுக்கு இக் கட்டணத்திலிருந்து முழு விலக்கு அளிக்கப்படுகிறது.

நிதி அமைச்சர் நிர்மலா சீதாராமன் விளக்கம்:

புதிய கட்டணத்திற்கு எதிர்க்கட்சிகள் எதிர்ப்பு தெரிவித்து வரும் நிலையில், மத்திய நிதி அமைச்சர் நிர்மலா சீதாராமன் அளித்த விளக்கம்: "முதலில் ஒன்றை அனைவரும் புரிந்து கொள்ள வேண்டும். எம்.டி.ஆர். கட்டணத்தை மத்திய அரசு விதிக்கவில்லை. யு.பி.ஐ. சேவை வழங்கும் நிறுவனங்கள், பேமெண்ட் சேவை அளிக்கும் நிறுவனங்கள் மற்றும் வணிக வங்கிகளே இதனை விதித்துள்ளன.

இது ஒரு வரியோ, 'செஸ்' எனப்படும் கூடுதல் வரியோ அல்லது 'சர்சார்ஜ்' எனப்படும் கூடுதல் கட்டணமோ அல்ல. இக்கட்டண வசூல் மத்திய அரசுக்கு வராது.

கட்டணப் பகிர்வு விவரம்:

வசூலிக்கப்படும் மொத்த எம்.டி.ஆர். கட்டணத்தில்:

40% வாடிக்கையாளரின் வங்கிக்கும்,

30% பேமெண்ட் சேவை அளிக்கும் நிறுவனத்திற்கும்,

20% யு.பி.ஐ. செயலிக்கும் (App),

10% யு.பி.ஐ. செயலியின் வங்கிக்கும் செல்லும்.

வாடிக்கையாளர்களுக்குப் பாதிப்பில்லை:

இக் கட்டணம் வாடிக்கையாளர்கள் மீது சுமத்தப்படாது, வணிகர்களால் மட்டுமே ஏற்றுக்கொள்ளப்படும். தொழில்நுட்பக் கட்டமைப்பைப் பராமரிக்கவும், டிஜிட்டல் பரிவர்த்தனையில் புத்தாக்கங்களை உருவாக்கவும் சேவை நிறுவனங்கள் இக் கட்டணத்தைப் பகிர்ந்து கொள்ளும்.

ரூபே கார்டு (RuPay Card) மூலம் செய்யப்படும் பரிவர்த்தனைகள் தொடர்ந்து இலவசமாக இருக்கும். ரூ.2 ஆயிரத்துக்கு உட்பட்ட பரிவர்த்தனைகளுக்குக் கட்டணம் கிடையாது. எனவே, தனிநபர்களுக்கும் வணிகர்களுக்கும் இடையிலான 96 சதவீத பரிவர்த்தனைகளுக்கு எம்.டி.ஆர். கட்டணத்தால் எந்தப் பாதிப்பும் இருக்காது" எனத் தெரிவித்துள்ளார்.