அஸ்வின் 6 விக்கெட்: சென்னை டெஸ்டில் வங்கதேசத்தை வீழ்த்தி இந்திய அணி அபார வெற்றி!!

சென்னையில் நடந்த வங்காளதேசத்துக்கு எதிரான முதலாவது டெஸ்டில் இந்திய அணி 280 ரன்கள் வித்தியாசத்தில் அபார வெற்றி பெற்றது. ‘உள்ளூர் நாயகன்’ அஸ்வின் 6 விக்கெட்டுகளை வீழ்த்தினார்.

இந்தியா - வங்காளதேசம் அணிகள் இடையிலான முதலாவது டெஸ்ட் கிரிக்கெட் போட்டி சென்னை சேப்பாக்கத்தில் உள்ள எம்.ஏ. சிதம்பரம் ஸ்டேடியத்தில் கடந்த 19-ந்தேதி தொடங்கியது. இதில் முதல் இன்னிங்சில் முறையே இந்தியா 376 ரன்களும், வங்காளதேசம் 149 ரன்களும் எடுத்தன. 227 ரன்கள் முன்னிலையுடன் 2-வது இன்னிங்சை ஆடிய இந்தியா 4 விக்கெட்டுக்கு 287 ரன்களுடன் ‘டிக்ளேர்’ செய்து வங்காளதேசத்துக்கு 515 ரன்களை வெற்றி இலக்காக நிர்ணயித்தது.

இமாலய இலக்கை நோக்கி 2-வது இன்னிங்சை ஆடிய வங்காளதேச அணி 3-வது நாள் முடிவில் 4 விக்கெட்டுக்கு 158 ரன்கள் எடுத்திருந்தது. கேப்டன் நஜ்முல் ஹூசைன் ஷன்டோ (51 ரன்), ஆல்-ரவுண்டர் ஷகிப் அல்-ஹசன் (5 ரன்) களத்தில் இருந்தார்.

இந்த நிலையில் 4-வது நாளான நேற்று வங்காளதேச பேட்ஸ்மேன்கள் தொடர்ந்து பேட் செய்தனர். தொடக்கத்தில் பும்ரா, முகமது சிராஜ் ஆகியோரின் வேகப்பந்து வீச்சை சமாளித்த ஷன்டோ- ஷகிப் அல்-ஹசன் கூட்டணி, அஸ்வினின் சுழல் தாக்குதலில் உடைந்தது. அவரது பந்து வீச்சில் அல்-ஹசன் (25 ரன், 56 பந்து, 3 பவுண்டரி) தடுத்து ஆட முற்பட்ட போது அருகில் நின்ற ஜெய்ஸ்வாலிடம் கேட்ச் ஆனார். முன்னதாக அல்-ஹசன் 17 ரன்னில் இருந்த போது ரிஷப் பண்ட்டின் தடுமாற்றத்தால் ஸ்டம்பிங் கண்டத்தில் இருந்து தப்பினாலும் அந்த வாய்ப்பை சரியாக பயன்படுத்திக் கொள்ள தவறினார்.

ஆடுகளத்தில் பந்து நன்கு சுழன்று திரும்பியதால் அஸ்வின்- ஜடேஜா சுழல் ஜாலத்தில் மிரட்டினர். அடுத்து வந்த விக்கெட் கீப்பர் லிட்டான் தாஸ் (1 ரன்) ஜடேஜா பந்து வீச்சில் ஸ்லிப்பில் நின்ற ரோகித் சர்மாவிடம் பிடிபட்டார். நீண்ட நேரம் போராடிய கேப்டன் ஷன்டோ (82 ரன், 127 பந்து, 8 பவுண்டரி, 3 சிக்சர்) ஜடேஜா வீசிய பந்தை தூக்கியடித்த போது சரியாக ‘கிளிக்’ ஆகாத அந்த பந்தை பும்ரா கேட்ச் செய்தார். எஞ்சிய பேட்ஸ்மேன்களும் சுழலுக்கே இரையானார்கள்.

மதிய உணவு இடைவேளைக்கு முன்பாக வங்காளதேச அணி 2-வது இன்னிங்சில் 62.1 ஓவர்களில் 234 ரன்களுக்கு ஆல்-அவுட் ஆனது. இதன் மூலம் இந்தியா 280 ரன்கள் வித்தியாசத்தில் மெகா வெற்றியை ருசித்தது. இந்திய தரப்பில் அஸ்வின் 6 விக்கெட்டுகளை அள்ளினார். ஜடேஜா 3 விக்கெட்டுகளை சாய்த்தார். அஸ்வின் ஆட்டநாயகன் விருதை பெற்றார்.

இந்த வெற்றியின் மூலம் 2 ேபாட்டிகள் கொண்ட டெஸ்ட் தொடரில் இந்தியா 1-0 என்ற கணக்கில் முன்னிலை வகிக்கிறது. இவ்விரு அணிகள் இடையிலான 2-வது டெஸ்ட் போட்டி வருகிற 27-ந்தேதி கான்பூரில் தொடங்குகிறது. 2-வது டெஸ்ட் போட்டிக்கான இந்திய அணியில் மாற்றமில்லை. 16 பேர் கொண்ட அதே அணியை 2-வது டெஸ்டுக்கும் தொடரும் என்று தேர்வு குழு அறிவித்துள்ளது.