தொகுதி மறுவரையறையில் ஏன் இந்த அவசியமற்ற அவசரம்? - பிரதமர் மோடிக்கு முதல்வர் கேள்வி!

பிரதமர் மோடி தலைமையிலான என்டிஏ அரசு, நாடாளுமன்றத்தின் அடிப்படை கட்டமைப்பையே சீர்குலைக்க முயல்வதாகவும், விவாதங்களுக்கும் பொறுப்புக்கூறலுக்கும் இடமளிக்காத வெற்றுச் சம்பிரதாய அவையாக நாடாளுமன்றத்தைச் சுருக்கி வருவதாகவும் அவர் குற்றம் சாட்டியுள்ளார்.

தொகுதி மறுவரையறை என்ற பெயரில் தொகுதிகளின் எண்ணிக்கையை உயர்த்துவது, மத்திய அரசின் "குறைந்தபட்ச அரசு, அதிகபட்ச நிர்வாகம்" என்ற முழக்கத்திற்கே எதிரானது என்று குறிப்பிட்டுள்ள அவர், இதனால் தேவையற்ற நிதிச்சுமையும் மக்களின் வரிப்பணம் வீணாவதும் தான் நிகழும் எனத் தெரிவித்துள்ளார். இந்தியாவை மாநிலங்களின் ஒன்றியமாக வரையறுக்கும் அரசியலமைப்புச் சட்டத்தின் பிரிவு 1-க்கு எதிராக, மாநிலங்களின் குரலைப் புறக்கணித்துச் செயல்படுவது ஜனநாயகத்தின் பன்முகத்தன்மைக்கும் கூட்டாட்சித் தத்துவத்திற்கும் விடப்பட்ட நேரடி சவாலாகும் என்றும் அவர் விமர்சித்துள்ளார்.

குறிப்பாக, இந்த மறுசீரமைப்பு நடவடிக்கை பாஜக ஆதிக்கம் செலுத்தும் வட மாநிலங்களுக்குச் சாதகமாக அமைந்து, மக்கள் தொகையைச் சிறப்பாகக் கட்டுப்படுத்திய தமிழ்நாடு, கர்நாடகா, கேரளா மற்றும் தெலங்கானா போன்ற தென்மாநிலங்களைத் தண்டிப்பதாக அமையும் என எச்சரித்துள்ளார். வட மாநிலங்களின் தொகுதி எண்ணிக்கை இருமடங்காகும் வேளையில், தென்மாநிலங்களின் பிரதிநிதித்துவம் வெறும் 24 விழுக்காட்டிலேயே தேங்கி நிற்பது கூட்டாட்சியைச் சிதைத்து அதிகாரத்தை ஒருசில பகுதிகளில் மட்டும் குவிக்கும் செயல் என்றும், இதனைத் தென்மாநில முதலமைச்சர்கள் ஒருங்கிணைந்து எதிர்ப்பதாகவும் அவர் சுட்டிக்காட்டியுள்ளார்.

மகளிர் இட ஒதுக்கீடு குறித்துப் பேசிய முதலமைச்சர், பெண்களுக்கு 33 விழுக்காடு இட ஒதுக்கீடு வழங்குவதை முழுமனதோடு ஆதரிப்பதாகத் தெரிவித்தார். ஆனால், தொகுதி எண்ணிக்கையை அதிகரிக்காமலேயே இப்போதுள்ள அளவிலேயே இந்த இட ஒதுக்கீட்டை வழங்க முடியும் என்றும், அதற்குப் பதிலாக மாநிலங்களைத் தண்டிக்கும் வகையில் மறுவரையறை செய்ய வேண்டிய அவசியம் என்ன என்றும் கேள்வி எழுப்பியுள்ளார். மேலும், ஓபிசி மக்களுக்கான கிரீமி லேயர் உச்சவரம்பை மாற்றாமல் வஞ்சிக்கும் மத்திய அரசு, சாதிவாரி கணக்கெடுப்பு முடிவுகளைக் கூடப் பரிசீலிக்காமல் அவசரம் காட்டுவது அதிகாரமளித்தல் அல்ல, மாறாகப் புறக்கணிப்புக்குச் செய்யப்பட்ட மாறுவேடம் என்று அவர் சாடியுள்ளார்.

இந்த ஒட்டுமொத்த நடவடிக்கையும் முறையான கலந்தாலோசனை இன்றி எடுக்கப்படுவதாகவும், இது நாடாளுமன்றத்தைப் பலவீனப்படுத்தி தென்னகத்தைப் புறக்கணிக்கும் அரசியல் சதித் திட்டம் என்றும் முதலமைச்சர் மு.க. ஸ்டாலின் தனது அறிக்கையில் தெரிவித்துள்ளார். இந்த விவகாரத்தில் மத்திய அரசு ஏன் வெளிப்படைத்தன்மையின்றி மாற்றி மாற்றிப் பேசுகிறது என்பதற்கும், இதனால் உண்மையாகப் பயனடையப் போவது யார் என்பதற்கும் நாட்டு மக்களுக்கு முறையான விளக்கமளிக்க வேண்டும் என அவர் வலியுறுத்தியுள்ளார்.