கன்னியாகுமரி - ஹைதராபாத் ரயிலை விரைவுப் பாதையில் இயக்கக் கோரிக்கை!

கன்னியாகுமரி - ஹைதராபாத் ரயிலைச் சுற்றும் பாதையைத் தவிர்த்து, விரைவுப் பாதையில் இயக்க வேண்டும் என்று பயணிகள் நலச்சங்கம் கோரிக்கை விடுத்துள்ளது. 

கன்னியாகுமரி மாவட்டத்திலிருந்து தெலங்கானா மாநிலத் தலைநகர் ஹைதராபாத்திற்கு நேரடி தினசரி ரயில் சேவை வேண்டும் என்பது கடந்த 30 ஆண்டுகாலக் கோரிக்கையாகும். நீண்ட போராட்டத்திற்குப் பிறகு தற்போது அறிவிக்கப்பட்டுள்ள வாராந்திர ரயில்கள், மிக நீண்ட சுற்றுப் பாதையில் இயக்கப்படுவதால் பயணிகள் கடும் அவதிக்குள்ளாகி வருகின்றனர்.

தற்போது கன்னியாகுமரி மற்றும் நாகர்கோவிலில் இருந்து ஹைதராபாத்திற்கு (கச்சிகுடா/சரளப்பள்ளி) மூன்று வாராந்திர ரயில்கள் இயக்கப்படுகின்றன. அவை:

நாகர்கோவில் - கச்சிகுடா: (மதுரை, நாமக்கல் வழி) – 27.15 மணி நேரம்.

நாகர்கோவில் - சரளப்பள்ளி (அமிர்த் பாரத்): (மதுரை, திருச்சி, சென்னை வழி) – 28.35 மணி நேரம்.

கன்னியாகுமரி - ஹைதராபாத்: (தஞ்சாவூர், மயிலாடுதுறை, விழுப்புரம், திருவண்ணாமலை வழி) – 32.53 மணி நேரம்.

கன்னியாகுமரி - ஹைதராபாத் ரயில் (மற்றும் தூத்துக்குடி - கச்சிகுடா ரயில்) திருச்சி, தஞ்சாவூர், கும்பகோணம், மயிலாடுதுறை வழியாகச் சுற்றுப் பாதையில் இயக்கப்படுகிறது. இதனால்:

இந்த ரயில் விழுப்புரம் வரை விரைவாக வந்தடைந்தாலும், அங்கிருந்து ஒருவழிப் பாதையான டெல்டா மாவட்டங்கள் வழியாகச் செல்வதால் பயண நேரம் தேவையின்றி அதிகரிக்கிறது.

ஹைதராபாத்திலிருந்து வரும் ரயில், நள்ளிரவு 2:30 மணிக்குக் கன்னியாகுமரி வந்தடைகிறது. இதனால் மதுரைக்குத் தெற்கே உள்ள பயணிகள் (சாத்தூர், கோவில்பட்டி, திருநெல்வேலி, நாகர்கோவில்) நள்ளிரவில் இறங்கி, ஊர்களுக்குச் செல்ல பேருந்து வசதி இன்றி விடியும் வரை ரயில் நிலையத்திலேயே காத்திருக்க வேண்டிய அவல நிலை உள்ளது.

விரைவுப் பாதை மாற்றம்: தற்போதுள்ள சுற்றுப் பாதையைத் தவிர்த்து, மதுரை, திருச்சி, விருத்தாசலம், விழுப்புரம், திருவண்ணாமலை வழியாகக் குறைந்த தூரம் கொண்ட விரைவுப் பாதையில் இந்த ரயிலை இயக்க வேண்டும்.

நேர மாற்றம்: பயண நேரத்தைக் குறைத்து, கன்னியாகுமரிக்கு இரவு 10:00 மணிக்குள் வந்து சேருமாறு கால அட்டவணையை மாற்றியமைக்க வேண்டும்.

சூப்பர் பாஸ்ட் அந்தஸ்து: இந்த வாராந்திர ரயிலைச் சூப்பர் பாஸ்ட் ரயிலாகத் தரம் உயர்த்தி இயக்க வேண்டும்.

மாற்று வழி: டெல்டா மாவட்டப் பயணிகளின் வசதிக்காக, ஒரு ரயிலை ராமேஸ்வரத்திலிருந்து புறப்பட்டு திருச்சி, தஞ்சாவூர், மயிலாடுதுறை வழியாக ஹைதராபாத்திற்கு இயக்கலாம். தென்மாவட்ட ரயில்கள் அனைத்தையும் ஒரே சுற்றுப் பாதையில் இயக்குவது முறையல்ல.

தென் மத்திய ரயில்வே மண்டலம் தனது எல்லைக்குள் விரைவுப் பாதையைப் பயன்படுத்தும் நிலையில், தெற்கு ரயில்வே மட்டும் பயணிகளை அவதிக்குள்ளாக்கும் சுற்றுப் பாதையைப் பயன்படுத்துவது கண்டிக்கத்தக்கது. எனவே, ரயில்வே துறை உடனடியாகப் பயணிகளின் நீண்டகாலக் கோரிக்கையைப் பரிசீலித்து, குறைந்த தூர விரைவுப் பாதையில் ரயில்களை இயக்க நடவடிக்கை எடுக்க வேண்டும் எனத் குமரி மாவட்டப் பயணிகள் சங்கம் சார்பில் வலியுறுத்தப்படுகிறது.