ஸ்டெர்லைட் ஆலையை நிரந்தரமாக அகற்ற நடவடிக்கை - முதல்வர் விஜய்க்கு கோரிக்கை!

தூத்துக்குடி ஸ்டெர்லைட் ஆலைக்கு எதிரான போராட்டத்தில் உயிர்நீத்த தியாகிகளின் 8-ஆம் ஆண்டு நினைவு தினம் வரும் மே 22 அன்று அனுசரிக்கப்பட உள்ள நிலையில், தூத்துக்குடி மண்ணிலிருந்து ஸ்டெர்லைட் ஆலையை நிரந்தரமாக அகற்றிட முதலமைச்சர் ஜோசப் விஜய் தலைமையிலான தமிழக அரசு அதிரடி உத்தரவு பிறப்பிக்க வேண்டும் என 'ஸ்டெர்லைட் எதிர்ப்பு மக்கள் கூட்டமைப்பு' கோரிக்கை விடுத்துள்ளது.

கடந்த 2018-ஆம் ஆண்டு மே 22 அன்று ஸ்டெர்லைட் ஆலையை நிரந்தரமாக மூட வலியுறுத்தித் தூத்துக்குடி மாவட்ட ஆட்சியர் அலுவலகம் நோக்கிப் பொதுமக்கள் பிரம்மாண்ட பேரணி நடத்தினர். அப்போது நடத்தப்பட்ட துப்பாக்கிச் சூட்டில் 13 பேரும், காவல்துறையின் கொடூர தடியடியில் 2 பேரும் என மொத்தம் 15 பேர் பரிதாபமாகப் பலியானார்கள். இந்தத் தியாகங்களின் வீரியத்தை உணர்ந்த அப்போதைய அதிமுக அரசு, அரசாணை மூலம் ஆலையை மூடியது. அதன் பின்னர் பொறுப்பேற்ற திமுக அரசும் நீதிமன்றங்களில் வழக்குகளைத் திறம்பட நடத்தி ஆலையைத் திறக்க விடாமல் முடக்கியது.

தற்போது வேதாந்தா நிறுவனம், 'பசுமை முறையில் தாமிர உற்பத்தி' செய்ய அனுமதி கோரி சென்னை உயர்நீதிமன்றத்தில் புதிய வழக்கு ஒன்றை தந்திரமாகத் தாக்கல் செய்துள்ளது. இந்த வழக்கில் ஒன்றிய அரசின் நிர்வாகத் துறைகளை எதிர்மனுதாரர்களாகச் சேர்த்து, பிரதமர் மோடி மற்றும் அனில் அகர்வால் ஆகியோர் இணைந்து குறுக்கு வழியில் ஆலையை மீண்டும் திறக்க முயற்சிப்பதாகப் போராட்டக் குழுவினர் குற்றம் சாட்டுகின்றனர்.

இந்த இக்கட்டான சூழலில், தமிழ்நாட்டின் புதிய முதலமைச்சராகப் பொறுப்பேற்றுள்ள மாண்புமிகு ஜோசப் விஜய் அவர்களுக்கு, ஸ்டெர்லைட் எதிர்ப்பு மக்கள் கூட்டமைப்பின் சட்ட ஆலோசகர்களான மதுரை உயர்நீதிமன்ற வழக்கறிஞர் சே. வாஞ்சிநாதன், தூத்துக்குடி மாவட்ட நீதிமன்ற வழக்கறிஞர் கெ. அரி ராகவன் ஆகியோர் விடுத்துள்ள முக்கியக் கோரிக்கைகள் பின்வருமாறு: முந்தைய அதிமுக மற்றும் திமுக அரசுகளின் கொள்கை முடிவைப் போலவே, புதிய முதலமைச்சர் ஜோசப் விஜய் அவர்களும் ஸ்டெர்லைட் ஆலைக்கு எதிரான உறுதியான நிலைப்பாட்டை எடுக்க வேண்டும். எந்த வடிவத்தில் வந்தாலும் ஆலைக்கு அனுமதி அளிக்கக் கூடாது.

துப்பாக்கிச் சூடு குறித்து விசாரித்த நீதிபதி அருணா ஜெகதீசன் ஆணையத்தின் பரிந்துரைகளை முந்தைய திமுக அரசு முழுமையாக அமல்படுத்தவில்லை. எனவே, தற்போதைய அரசு இப்பரிந்துரைகளை ஏற்று, விதிகள மீறிய 17 காவல்துறையினர் மற்றும் 4 வருவாய்த் துறையினர் மீது உடனடியாகக் கடுமையான குற்றவியல் மற்றும் துறை ரீதியான நடவடிக்கைகளை எடுக்க வேண்டும்.

தூத்துக்குடி மண்ணிற்காக உயிர்நீத்த தியாகிகளின் நினைவைப் போற்றும் வகையில், தூத்துக்குடி மாநகரின் முக்கியப் பகுதியில் அரசு சார்பில் பிரம்மாண்ட நினைவுச் சின்னம் எழுப்பப்பட வேண்டும். உச்சநீதிமன்றமே ஆலையை மூடியது சரி என்று இறுதித் தீர்ப்பளித்த பிறகும், தமிழ்நாடு அரசின் நிலத்தில் அமைந்துள்ள ஸ்டெர்லைட் ஆலையை இன்னும் அகற்றாமல் வைத்திருப்பது நீதிமன்ற அவமதிப்பாகும். எனவே, அந்த ஆலையை உடனடியாக இடித்து அப்புறப்படுத்தத் தமிழக அரசு உத்தரவிட வேண்டும்.

மேற்கண்ட நியாயமான கோரிக்கைகளை வலியுறுத்தி, வரும் மே 22-ஆம் தேதி தூத்துக்குடியில் நடைபெறும் 8-ஆம் ஆண்டு தியாகிகள் நினைவு தினப் பொது நிகழ்வில் தமிழ்நாட்டின் அனைத்துக் கட்சிகள், சமூக இயக்கங்கள், மனித உரிமை அமைப்புகள் மற்றும் மக்கள் சங்கங்கள் பெருந்திரளாகக் கலந்து கொண்டு தியாகிகளுக்கு அஞ்சலி செலுத்த வேண்டும் என ஸ்டெர்லைட் எதிர்ப்பு மக்கள் கூட்டமைப்பு கூட்டாக வேண்டுகோள் விடுத்துள்ளது.