விசில் சின்னத்திற்கு வாக்களித்ததை வீடியோ எடுத்த பெண்: தேர்தல் அதிகாரிகள் விசாரணை!

» செய்திகள் - விளையாட்டு » மாவட்ட செய்தி (தூத்துக்குடி)

விசில் சின்னத்திற்கு வாக்களித்ததை வீடியோ எடுத்த பெண்: தேர்தல் அதிகாரிகள் விசாரணை!

வெள்ளி 24, ஏப்ரல் 2026 9:03:57 AM (IST)

தூத்துக்குடி சட்டமன்றத் தொகுதியில் தேர்தல் வாக்குப்பதிவு இயந்திரத்தில் ஒரு குறிப்பிட்ட சின்னத்திற்கு வாக்களிப்பதை வீடியோ எடுத்து சமூக வலைதளங்களில் பரவவிட்ட சம்பவம் பெரும் பரபரப்பை ஏற்படுத்தியுள்ளது.

தமிழக சட்டமன்றத் தேர்தல் வாக்குப்பதிவு நேற்று நடந்து முடிந்த நிலையில், தூத்துக்குடியில் ஒரு வீடியோ வைரலாகி வருகிறது. அதில், ஒரு பெண் வாக்காளர் வாக்குப்பதிவு இயந்திரத்தில் தமிழக வெற்றிக் கழக (த.வெ.க) வேட்பாளர் ஸ்ரீநாத்தின் 'விசில்' சின்னத்திற்கு வாக்களிப்பது போன்ற காட்சிகள் இடம்பெற்றுள்ளன.

மேலும் அந்த வீடியோவின் பின்னணியில், "ஜெயிச்சிடுவேல்லா சாமி, ஊரே உனக்காக வேண்டுது சாமி" என்ற சினிமா வசனமும் ஒலிக்கவிடப்பட்டுள்ளது. இந்த வீடியோ த.வெ.க-வினரின் வாட்ஸ்-அப் குழுக்களில் அதிவேகமாகப் பகிரப்பட்டு வருகிறது.

வாக்குச்சாவடி மையங்களுக்குள் செல்போன் கொண்டு செல்ல தேர்தல் ஆணையம் கடுமையான தடை விதித்துள்ளது. மேலும், தான் யாருக்கு வாக்களித்தோம் என்பதைப் புகைப்படம் அல்லது வீடியோ எடுத்து வெளியிடுவது வாக்கு ரகசியத்தை மீறும் செயலாகும். மக்கள் பிரதிநிதித்துவச் சட்டத்தின்படி இது தண்டனைக்குரிய குற்றமாகும்.

கடுமையான சோதனைகளையும் மீறி வாக்குச்சாவடிக்குள் செல்போன் கொண்டு சென்றது எப்படி? இந்த வீடியோ எப்போது, எந்த வாக்குச்சாவடியில் எடுக்கப்பட்டது? என்பது குறித்துத் தேர்தல் அதிகாரிகள் மற்றும் போலீசார் தீவிர விசாரணை நடத்தி வருகின்றனர்.

தூத்துக்குடி தொகுதியில் திமுக, அதிமுக, நாம் தமிழர் மற்றும் த.வெ.க எனப் பலமுனைப் போட்டி நிலவும் சூழலில், இந்த வீடியோ விவகாரம் மாவட்ட தேர்தல் களத்தில் பெரும் விவாதத்தை ஏற்படுத்தியுள்ளது.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து: