தூத்துக்குடியில் கீதா ஜீவன் தீவிர வாக்கு சேகரிப்பு : பூ மார்க்கெட், குடியிருப்புப் பகுதிகளில் ஆதரவு திரட்டல்!

மதச்சார்பற்ற முற்போக்கு கூட்டணியின் தூத்துக்குடி சட்டமன்றத் தொகுதி திமுக வேட்பாளர் கீதா ஜீவன், இன்று தொகுதிக்கு உட்பட்ட பல்வேறு பகுதிகளில் தீவிரமாகச் சுற்றுப்பயணம் செய்து வாக்காளர்களைச் சந்தித்து ஆதரவு திரட்டினார்.

இன்று காலை தூத்துக்குடி மாநகராட்சி 9-வது வார்டுக்கு உட்பட்ட பகுதிகளில் கீதா ஜீவன் தனது பிரசாரத்தைத் தொடங்கினார். பூபாலராயர்புரம், வெற்றிவேல் புரம், சாமுவேல் புரம் (கிழக்கு & மேற்கு), எஸ்.எஸ். மாணிக்கபுரம் உள்ளிட்ட தெருக்களுக்கு நேரில் சென்ற அவர், அங்குள்ள வாக்காளப் பெருமக்களைச் சந்தித்து திமுக அரசின் சாதனைகளை எடுத்துரைத்தார். வரும் தேர்தலில் 'உதயசூரியன்' சின்னத்தில் வாக்களித்துத் தன்னை மீண்டும் வெற்றி பெறச் செய்யுமாறு அவர் கேட்டுக்கொண்டார்.

இந்த நிகழ்வின் போது பகுதி செயலாளர்கள் நிர்மல் ராஜ், ஜெயக்குமார், வட்டச் செயலாளர் கருப்பசாமி மற்றும் மாமன்ற உறுப்பினர் ஜெபஸ்டின் சுதா உள்ளிட்ட கழக நிர்வாகிகள் உடனிருந்தனர்.

இதனைத் தொடர்ந்து, இன்று மதியம் தூத்துக்குடி நகரின் முக்கியப் பகுதியான பூ மார்க்கெட் பகுதிக்குச் சென்றார். அங்குள்ள பூ வியாபாரிகள், சிறு குறு தொழிலாளர்கள் மற்றும் மார்க்கெட்டிற்கு வந்திருந்த பொதுமக்களிடம் துண்டுப் பிரசுரங்களை வழங்கி உதயசூரியன் சின்னத்திற்கு வாக்கு சேகரித்தார். வியாபாரிகளின் கோரிக்கைகளைக் கேட்டறிந்த அவர், அவை உரிய முறையில் நிறைவேற்றப்படும் என உறுதியளித்தார்.