திமுக வேட்பாளர் கீதா ஜீவனுக்கு சமத்துவ மக்கள் கழகம் ஆதரவு: தனித்துப் போட்டி முடிவு கைவிடப்பட்டது!

2026 சட்டமன்றத் தேர்தலில் தூத்துக்குடி தொகுதி திமுக வேட்பாளர் அமைச்சர் பி. கீதா ஜீவனுக்கு, சமத்துவ மக்கள் கழகத்தினர் தங்களது முழு ஆதரவைத் தெரிவித்துள்ளனர்.

திமுக கூட்டணியில் இருந்து வந்த சமத்துவ மக்கள் கழகத்திற்குத் தொகுதி ஒதுக்கீடு செய்யப்படாததால், அக்கட்சி முதலில் தனித்துப் போட்டியிட முடிவு செய்திருந்தது. இந்நிலையில், சமத்துவ மக்கள் கழக நிறுவனத் தலைவர் எர்ணாவூர் நாராயணனை, திமுக தலைவரும் முதலமைச்சருமான மு.க. ஸ்டாலின் நேரில் சந்தித்துப் பேச்சுவார்த்தை நடத்தினார். இதில் சுமுக முடிவு ஏற்பட்டதைத் தொடர்ந்து, திமுக தலைமையிலான மதச்சார்பற்ற முற்போக்கு கூட்டணிக்குச் சமத்துவ மக்கள் கழகம் தனது ஆதரவை உறுதி செய்தது.

இதனைத் தொடர்ந்து, சமத்துவ மக்கள் கழகத் தூத்துக்குடி மாவட்டச் செயலாளர் மாலைசூடி பி.எம். அற்புதராஜ் தலைமையில் அக்கட்சி நிர்வாகிகள், திமுக தூத்துக்குடி வடக்கு மாவட்டச் செயலாளரும், தூத்துக்குடி சட்டமன்றத் தொகுதி வேட்பாளருமான அமைச்சர் பி. கீதா ஜீவனை நேரில் சந்தித்தனர். அவருக்குச் சால்வை அணிவித்து, வரும் தேர்தலில் திமுக கூட்டணி வெற்றி பெறத் தீவிரமாகப் பணியாற்றுவோம் என ஆதரவு தெரிவித்தனர்.

இந்நிகழ்ச்சியில் சமத்துவ மக்கள் கழக மாநிலத் தொழிற்சங்கச் செயலாளர் ஜெபராஜ் டேவிட், மாநில வழக்கறிஞர் அணித் துணைச் செயலாளர் வக்கீல் சகாயராஜ், மாவட்டத் தலைவர் அருண் சுரேஷ்குமார், மாவட்டச் செயலாளர் டேனியல் ராஜ் உள்ளிட்ட திரளான நிர்வாகிகள் உடனிருந்தனர்.