நாசரேத் பொறியியல் கல்லூரி சார்பில் வாக்காளர் விழிப்புணர்வு பேரணி!

நாசரேத் ஜெயராஜ் அன்னபாக்கியம் சிஎஸ்ஐ பொறியியல் கல்லூரி சார்பில் வாக்காளர் விழிப்புணர்வு பேரணி நடந்தது.

தூத்துக்குடி _ நாசரேத் திருமண்டலம் நாசரேத் ஜெயராஜ் அன்னபாக்கியம் சிஎஸ்ஐ பொறியியல் கல்லூரி சார்பில் பொதுமக்களிடையே வாக்காளர் பட்டியலில் பெயர் சேர்க்க, நீக்கம், திருத்தம் செய்ய சிறப்பு முகாம் நடைபெறுவது பற்றிய விழிப்புணர்வு ஏற்படுத்தும் வகையில் வாக்காளர் விழிப்புணர்வு பேரணி நடந்தது.

பேரணியை ஏரல் தாலுகா தேர்தல் துணை வட்டாட்சியர் முத்துலட்சுமி தலைமை ஏற்று தொடங்கி வைத்தார். கல்லூரி முதல்வர் ஜெயக்குமார் முன்னிலை வகித்தார். பேரணியானது நாசரேத் கிராம நிர்வாக அலுவலகத்தின் முன்பிருந்து புறப்பட்டு ரயில் நிலையம், பேருந்து நிலையம், சந்தி பஜார் வழியாக லூக்கா மருத்துவமனை சென்றடைந்தது. பேரணியில் பொது மக்களுக்கு துண்டு பிரதிகள் வழங்கப்பட்டன.

பேரணியில் ஆழ்வார்திருநகரி குறுவட்ட வருவாய் ஆய்வாளர் மகாதேவன், கிராம நிர்வாக அலுவலர் சிவராமன் மற்றும் கல்லூரி பேராசிரியர்கள், அலுவலர்கள், மாணவ_ மாணவிகள் கலந்து கொண்டனர். இதற்கான ஏற்பாடுகளை கல்லூரி தாளாளர் வழக்கறிஞர் ஜெயக்குமார் ரூபன் தலைமையில் முதல்வர் ஜெயக்குமார், நிர்வாக அதிகாரி வினோதா, நாட்டு நலப்பணித்திட்ட அலுவலர் ஞானசெல்வன், உடற்கல்வி இயக்குனர் ஜோஸ்சுந்தர் மற்றும் பேராசிரியர்கள் செய்திருந்தனர்.