கஞ்சா கடத்தலில் ஈடுபட்டவர்களை கைது செய்த போலீசாருக்கு எஸ்பி பாராட்டு!!

காவல்துறை கூடுதல் இயக்குநர் (குற்றம்) சென்னை மற்றும் தென்மண்டல காவல்துறை தலைவர் ஆகியோர்களின் குறிப்பாணையின்படி தூத்துக்குடி மாவட்டத்தில் கஞ்சா கடத்தலில் ஈடுபட்டவர்களை கைது செய்து மேற்படி குற்ற வழக்குகளில் குற்றவாளிகளுக்கு தண்டனை பெற்று தர சிறப்பாக பணிபுரிந்த தூத்துக்குடி மாவட்ட காவல்துறையினருக்கு காவல்துறை கூடுதல் இயக்குநர் (குற்றம்) சென்னை பாராட்டுச் சான்றிதழ் மற்றும் வெகுமதி வழங்கியுள்ளார்.

அதன்படி தூத்துக்குடி மாவட்ட காவல் கண்காணிப்பாளர் ஆல்பர்ட் ஜான் இன்று (19.11.2024) மாவட்ட காவல்துறை அலுவலகத்தில் வைத்து சிறப்பாக பணிபுரிந்த 30 காவல்துறையினருக்கு மேற்படி பாராட்டுச் சான்றிதழ் மற்றும் வெகுமதியை வழங்கி வாழ்த்தினார்.

தூத்துக்குடி மாவட்டம் குலசேகரன்பட்டினம் அருள்மிகு முத்தாரம்மன் திருக்கோவில் தசரா திருவிழா மற்றும் திருச்செந்தூர் அருள்மிகு சுப்பிரமணிய சுவாமி கோவில் கந்த சஷ்டி விழா ஆகிய திருவிழாக்களின் போது எந்தவித அசம்பாவிதமும் இன்றி அமைதியான முறையில் நடைபெற சிறப்பான முறையில் பாதுகாப்பு ஏற்பாடுகளை மேற்கொண்ட திருச்செந்தூர் உட்கோட்ட காவல் துணை கண்காணிப்பாளர் வசந்தராஜ் அவர்களை மாவட்ட காவல் கண்காணிப்பாளர் ஆல்பர்ட் ஜான் இன்று மாவட்ட காவல்துறை அலுவலகத்தில் வைத்து நினைவுப்பரிசு வழங்கி பாராட்டினார்.