தூத்துக்குடியில் ரூ.50 லட்சம் மதிப்புள்ள நிலம் மோசடி : வாலிபர் கைது!

தூத்துக்குடி அண்ணாநகரை சேர்ந்தவர் சண்முகம். இவருடைய மகன் சங்கரநாராயணன். இவர் சங்கரப்பேரி பகுதியில் 1987-ம் ஆண்டு 9.51 சென்ட் நிலம் வாங்கினாராம். இந்த நிலத்துக்கான பட்டா பெறாமல் இருந்து உள்ளார். இதனால் அந்த இடம் முதன் முதலாக கிரையம் பெற்று இருந்த சீராளன் என்பவர் பெயரில் இருந்து உள்ளது. 

இதனை அறிந்த சீராளனின் மனைவி சமுத்திரவள்ளி, மகள்கள் ஜெயசுதா, காயத்ரி, மகன் ராம் மனோகர் ஆகியோர் சிலருடன் கூட்டு சேர்ந்து, அந்த நிலத்தை போலியாக பாகவிடுதலை ஆவணங்கள் உருவாக்கி உள்ளனர். அதனை பயன்படுத்தி அந்த இடத்தில் ஒரு பகுதியான 5.32 சென்ட் நிலத்தை டூவிபுரத்தை சேர்ந்த தாளமுத்து என்பவருக்கு கிரையம் செய்து கொடுத்து உள்ளனர். மீதம் உள்ள 3.91 சென்ட் நிலத்தை முள்ளக்காட்டை சேர்ந்த சிவக்குமார் என்பவருக்கு பொது அதிகாரம் அளித்து சொத்தை மோசடியாக அபகரித்து உள்ளனர்

இதுகுறித்து சங்கரநாரயணன் தனது நிலத்தை சமுத்திரவள்ளி, ராம்மனோகர், ஜெயசுதா, காயத்ரி, சிவக்குமார், தாளமுத்து ஆகியோர் கூட்டுசதி செய்து அபகரித்துள்ளதாக அளித்த புகாரின் பேரில் நில அபகரிப்பு தடுப்பு சிறப்பு பிரிவு காவல் துணை கண்காணிப்பாளர் உரிய நடவடிக்கை எடுக்க மாவட்ட காவல் கண்காணிப்பாளர் எல். பாலாஜி சரவணன், உத்தரவிட்டுள்ளார்.

அதன்பேரில் நில அபகரிப்பு தடுப்பு சிறப்பு பிரிவு காவல் துணை கண்காணிப்பாளர் சம்பத் மேற்பார்வையில் காவல் ஆய்வாளர் தேவி தலைமையில் உதவி ஆய்வாளர் காமராஜ், தலைமைக் காவலர் அருணாச்சலம், முதல் நிலை காவலர்கள் சித்திரைவேல், பன்னீர்வேல் செல்வம் ஆகியோர் ரூ.50 லட்சம் மதிப்புள்ள சொத்தை மோசடி செய்த ராம் மனோகரை (24) கைது செய்தனர்.  மேலும் இதுகுறித்து நில அபகரிப்பு தடுப்பு சிறப்பு போலீசார் விசாரணை மேற்கொண்டு வருகின்றனர்.