மளிகை தொகுப்பு வழங்காமல் அலைக்கழிப்பு : தூத்துக்குடியில் பொதுமக்கள் புகார்

தூத்துக்குடி ரேசன் கடைகளில் தமிழக அரசு அறிவித்துள்ள மளிகை பொருட்களை வழங்காமல் அலைக்கழிப்பதாக பொதுமக்கள் புகார் தெரிவித்துள்ளனர். 

தமிழ்நாட்டில் கரோனா ஊரடங்கு நிவாரண உதவித் தொகையாக 2வது தவனை 2 ஆயிரம் ரூபாய் ரொக்கப் பணம், மற்றும் 14 வகையான மளிகை பொருட்களுக்கான டோக்கன் ரேஷன் கடை ஊழியர்களால் வழங்கப்பட்டு வருகிறது. இந்த திட்டத்தை கடந்த 3ம் தேதி தலைமை செயலகத்தில் முதல்வர் மு.க.ஸ்டாலின் தொடங்கி வைத்தார். இதற்றாக ரேஷன் கார்டுதாரர்களுக்கு டோக்கன் வழங்கப்பட்டு மளிகை பொருட்கள் வழங்கப்படுகிறது. 

இந்நிலையில், தூத்துக்குடி புதுக்கிராம் பகுதியில் உள்ள ரேஷன் கடையில் டோக்கன் வழங்கப்பட்டும் குடும்ப அட்டைதாரர்களுக்கு மளிகைப் பொருட்களின் தொகுப்பு வழங்காமல் இன்று, நாளை என்று கடை ஊழியர்கள் அலைக்கழிப்பதாக பொதுமக்கள் புகார் தெரிவித்துள்ளனர். இதுபோல் அமுதம், கூட்டுறவு அங்காடிகளில் பொதுமக்கள் அலைக்கழிக்கப்படுவதாக கூறப்படுகிறது தமிழக அரசு மளிகைப் பொருட்களை ஒதுக்கீடு செய்தும், ரேஷன் கடை ஊழியர்கள் அதனை வழங்காமல் இருப்பதற்கு காரணம் என்ன என்பது குறித்து மாவட்ட ஆட்சியர் விசாரணை நடத்த உத்தரவிட வேண்டும் என பொதுமக்கள் கோரிக்கை விடுத்துள்ளனர்.