தமிழகத்தில் திறமையற்ற அரசாங்கம் நடைபெற்று வருவதால்தான் ஜிஎஸ்டி வசூல் கடுமையாகக் குறைந்து, மாநிலத்திற்குப் பெரும் வருவாய் இழப்பு ஏற்பட்டுள்ளதாக அதிமுக பொதுச்செயலாளர் எடப்பாடி பழனிசாமி சாடியுள்ளார்.
சென்னை விமான நிலையத்தில் செய்தியாளர்களைச் சந்தித்த அதிமுக பொதுச்செயலாளர் எடப்பாடி பழனிசாமி தெரிவித்ததாவது: "தீபாவளி பண்டிகை வரவுள்ள நிலையில் அனைத்துப் பொருட்களின் விலையும் விண்ணை முட்டும் அளவுக்கு உயர்ந்துள்ளது. தவெக ஆட்சியில் அரிசி, பருப்பு, சர்க்கரை உள்ளிட்ட அத்தியாவசியப் பொருட்களின் விலை தொடர்ந்து உயர்ந்து கொண்டே செல்கிறது. தமிழகம் தற்போது மிக மோசமான நிலையில் உள்ளது. இந்த விலைவாசி உயர்வைக் குறைக்க தவெக அரசு எந்தவித நடவடிக்கையும் எடுக்கவில்லை."
தொடர்ந்து பேசிய அவர், "நாட்டின் பல்வேறு மாநிலங்களில் ஜிஎஸ்டி வரி வருவாய் குறிப்பிடத்தக்க அளவில் அதிகரித்துள்ள நிலையில், நமது மாநிலத்தில் 3 சதவீதம் மட்டுமே பதிவாகியுள்ளது. திறமையற்ற அரசாங்கம் நடந்து வருவதால் தான் தமிழ்நாட்டின் ஜிஎஸ்டி வசூல் குறைந்து விட்டது. இந்த நிர்வாகத் திறமையின்மையால் ஏற்படும் வருவாய் இழப்பு, அரசின் நலத்திட்டங்களைச் செயல்படுத்துவதையும் கடுமையாகப் பாதிக்கும்," என எச்சரித்தார்.
மேலும், "தமிழ்நாட்டின் 234 தொகுதிகளுக்கும் விஜய்தான் முதலமைச்சர். ஆனால், இடைத்தேர்தல் வரவுள்ள தொகுதிகளுக்கு மட்டுமே நேரில் சென்று நலத்திட்ட உதவிகளை வழங்கி வருகிறார்," என்றும் எடப்பாடி பழனிசாமி குற்றம் சாட்டினார்.