தனியார் பள்ளிகளுக்கு நிரந்தர அங்கீகாரம் வழங்க ரூ.400 கோடி லஞ்சம் பெற்ற வழக்கில் கைதான முன்னாள் அமைச்சர் அன்பில் மகேஸ் பொய்யாமொழியை 3 நாட்கள் காவலில் எடுத்து விசாரிக்கச் சென்னை ஊழல் தடுப்புச் சிறப்பு நீதிமன்றம் அனுமதி அளித்துள்ளது.
தனியார் பள்ளிகளுக்கு நிரந்தர அங்கீகாரம் வழங்க ரூ.400 கோடி லஞ்சம் பெற்ற வழக்கில் கைதான திமுக முன்னாள் அமைச்சர் அன்பில் மகேஸ் பொய்யாமொழியை 3 நாட்கள் போலீஸ் காவலில் எடுத்து விசாரிக்க நீதிமன்றம் அனுமதி வழங்கியுள்ளது.
தமிழகத்தில் உள்ள தனியார் பள்ளிக்கூடங்களுக்கு நிரந்தர அங்கீகாரம் வழங்குவதற்கு ரூ.400 கோடி லஞ்சம் பெற்றதாகக் கூறப்படும் வழக்கில், முன்னாள் அமைச்சர் அன்பில் மகேஷ் பொய்யாமொழியைச் சென்னை மத்திய குற்றப்பிரிவு போலீசார் கடந்த அக்டோபர் 26-ஆம் தேதி அதிரடியாகக் கைது செய்தனர்.
இதனைத் தொடர்ந்து அவர் வரும் நவம்பர் 6-ஆம் தேதி வரை நீதிமன்றக் காவலில் சென்னை புழல் சிறையில் அடைக்கப்பட்டுள்ளார். அவர் ஜாமீன் கோரி மனுத்தாக்கல் செய்திருந்த நிலையில், வழக்கில் கூடுதல் விசாரணை நடத்துவதற்காக அவரைப் போலீஸ் காவலில் எடுத்து விசாரிக்க மத்திய குற்றப்பிரிவு போலீசார் மனுத் தாக்கல் செய்தனர்.
3 நாட்கள் காவலில் விசாரிக்க அனுமதி:
இந்த மனு மீதான விசாரணை ஊழல் தடுப்புச் சிறப்பு நீதிமன்றத்தில் நடைபெற்று வந்த நிலையில், தீர்ப்பு நவம்பர் 2-ஆம் தேதிக்கு (இன்று) ஒத்திவைக்கப்பட்டிருந்தது.
அதன்படி, இந்த வழக்கு இன்று மீண்டும் விசாரணைக்கு வந்தது. வழக்கை விசாரித்த சிறப்பு நீதிமன்றம், அன்பில் மகேஸை இன்று மதியம் 1 மணி முதல் வரும் 4-ஆம் தேதி மாலை வரை 3 நாட்கள் போலீஸ் காவலில் வைத்து விசாரிக்க அனுமதி வழங்கி உத்தரவிட்டது.
நீதிமன்றத்தின் நிபந்தனைகள்:
விசாரணைக்கு அழைத்துச் செல்வதற்கு முன்பாக அன்பில் மகேஸுக்கு முறையான மருத்துவப் பரிசோதனை மேற்கொள்ளப்பட வேண்டும். விசாரணை என்ற பெயரில் அவரை உடலளவிலும், மனதளவிலும் எவ்விதத்திலும் துன்புறுத்தக் கூடாது. காவல் துறை விசாரணையின் போது அவரது வழக்கறிஞர் உடன் இருக்க அனுமதி வழங்கப்படுகிறது.
விசாரணை முடிவடைந்ததும், வரும் 5-ஆம் தேதி மாலை 5 மணிக்கு அவரை மீண்டும் நீதிமன்றத்தில் ஆஜர்படுத்த வேண்டும் என்று நீதிமன்றம் உத்தரவிட்டுள்ளது.