தூத்துக்குடி மாவட்டத்தைச் சேர்ந்த மாநில அரசு ஓய்வூதியதாரர்கள் மற்றும் குடும்ப ஓய்வூதியதாரர்களின் குறைகளைக் கேட்டறிந்து உடனடியாக நிவர்த்தி செய்யும் வகையில், வரும் டிசம்பர் 4-ம் தேதி குறைதீர்க்கும் நாள் கூட்டம் நடைபெறவுள்ளதாக மாவட்ட ஆட்சியர் விஷு மகாஜன் தெரிவித்துள்ளார்.
தூத்துக்குடி மாவட்டத்தில் உள்ள மாநில அரசு அலுவலகங்களில் பணிபுரிந்து ஓய்வுபெற்றவர்கள் மற்றும் பணியிலிருக்கும்போது மரணமடைந்த பணியாளர்களின் குடும்பத்தினர் சந்திக்கும் ஓய்வூதியம் மற்றும் இதர ஓய்வுகால பலன்கள் தொடர்பான குறைகளை நேரில் கேட்டறிந்து விரைவாகத் தீர்வு காண இக் கூட்டம் ஏற்பாடு செய்யப்பட்டுள்ளது.
இக்கூட்டம் வரும் 04.12.2026 அன்று காலை 10.30 மணிக்குத் தூத்துக்குடி மாவட்ட ஆட்சியர் அலுவலகத்தில், மாவட்ட ஆட்சியர் தலைமையில், திருநெல்வேலி கருவூலம் மற்றும் கணக்குத் துறை மண்டல இணை இயக்குநர் அவர்களால் நடத்தப்படவுள்ளது.
விண்ணப்பிக்கும் முறை & கடைசி நாள்:
ஓய்வூதியம் தொடர்பான கோரிக்கைகள் உள்ளவர்கள் தங்களது மனுக்களை இரண்டு பிரதிகளில் (Two Copies) தயாரித்து அனுப்ப வேண்டும். மனுவில் கீழ்க்காணும் 8 விவரங்கள் தெளிவாகக் குறிப்பிடப்பட வேண்டும்:
கடைசியாகப் பணிபுரிந்து ஓய்வுபெற்ற பதவி மற்றும் அலுவலகத்தின் பெயர்
ஓய்வுபெற்ற நாள்
ஓய்வூதியக் கொடுப்பாணை எண் (PPO Number)
ஓய்வூதியம் பெற்றுவரும் கருவூலத்தின் பெயர்
வீட்டு முகவரி
தொலைபேசி / கைபேசி எண்
கோரிக்கையின் முழு விவரம்
கோரிக்கை எந்த அலுவலரிடம் நிலுவையில் உள்ளது?
மேற்கண்ட விவரங்களுடன் தயாரித்த மனுக்களை வரும் 25.10.2026-ம் தேதிக்குள் “மாவட்ட ஆட்சியர், கோரம்பள்ளம், தூத்துக்குடி – 628 101” என்ற முகவரிக்குத் தபால் மூலமாக வந்து சேருமாறு அனுப்பி வைக்க வேண்டும்.
25.10.2026-க்குப் பின்னர் பெறப்படும் மனுக்கள் எக்காரணம் கொண்டும் ஏற்றுக்கொள்ளப்பட மாட்டாது. மனு அனுப்பிய ஓய்வூதியதாரர்கள் வரும் 04.12.2026 அன்று காலை 10.30 மணிக்கு நடைபெறும் குறைதீர்க்கும் நாள் கூட்டத்தில் தவறாது கலந்துகொள்ளுமாறு மாவட்ட ஆட்சியர் விஷு மகாஜன் கேட்டுக்கொண்டுள்ளார்.