யோகிபாபுவுக்கு கிரிக்கெட் பேட் பரிசளித்த எம்.எஸ்.தோனி!

நகைச்சுவை நடிகர் யோகிபாபுவுக்கு இந்திய அணியின் முன்னாள் கேப்டன் தோனி கிரிக்கெட் பேட் ஒன்றை பரிசளித்துள்ளார். 

ஹரிஷ் கல்யாண், இவானா நடிப்பில் ‘லெட்ஸ் கெட் மேரீட்’ என்ற திரைப்படத்தின் மூலம் இந்திய அணியின் முன்னாள் கேப்டன் தோனி தயாரிப்பாளராக தமிழ் சினிமாவில் களம் இறங்குகிறார். நதியா, யோகிபாபு இந்தப் படத்தில் முக்கிய கதாபாத்திரத்தில் நடிக்கின்றனர். விஷ்வஜித் படத்திற்கு இசையமைக்கிறார். தோனி புரொடக்‌ஷன் சார்பில் தயாரிக்கும் இந்தப் படத்தின் பூஜை மற்றும் படத்தின் தலைப்பு குறித்தான அறிவிப்பு சமீபத்தில் வெளியானது.

இந்நிலையில், யோகிபாபுவுக்கு கிரிக்கெட் பேட் ஒன்றை தோனி பரிசளித்துள்ளார். இது தொடர்பாக யோகிபாபு தனது ட்விட்டர் பக்கத்தில் வெளியிட்டுள்ள பதிவில் "எம்.எஸ். தோனி கைகளில் இருந்தும் அவர் விளையாடிய நெட்டில் இருந்தும் நேரடியாக இந்த பேட் எனக்கு கிடைத்துள்ளது. இந்த பேட்டை எனக்குக் கொடுத்ததற்கு நன்றி தோனி சார். உங்கள் கிரிக்கெட் நினைவுகளைப் போல சினிமாவில் நீங்கள் கால்பதித்திருக்கும் இந்த நினைவுகளையும் எப்போதும் மகிழ்ச்சியுடன் நினைவு கூர்வேன்" என்று பதிவிட்டுள்ளார்.