தவெக அரசின் நிர்வாகத் தோல்வி: மின்கட்டணக் குளறுபடிகளுக்கு பாஜக கண்டனம்!

தமிழக மக்களைப் பெருமளவில் பாதிக்கும் மின்கட்டணக் குளறுபடிகளுக்குத் தவெக அரசு உடனடித் தீர்வு காண வேண்டும் என்றும், இப்பிரச்சினையைச் சீரமைக்காவிட்டால் பாஜக சார்பில் மாநிலம் தழுவிய பெரும் போராட்டங்கள் முன்னெடுக்கப்படும் என்றும் தமிழக பாஜக தலைவர் நயினார் நாகேந்திரன் எச்சரித்துள்ளார்.

இது குறித்து அவர் வெளியிட்டுள்ள அறிக்கையில் தெரிவித்துள்ளதாவது: பொதுமக்களுக்கு நேர்மையான, துல்லியமான சேவைகளை வழங்க வேண்டிய மின்சார வாரியம் தனது பொறுப்பிலிருந்து முழுமையாகத் தவறியுள்ளது. மீட்டர் கணக்கீடு, பில்லிங் குளறுபடிகள் காரணமாக மக்களுக்குத் தவறான மின்கட்டணங்கள் அனுப்பப்பட்டுள்ளன. இத்தகைய தவறான பில்லிங் முறைகளால் ஏழை, எளிய, நடுத்தர மக்கள் செய்வதறியாது தவித்து வருகின்றனர்.

மின்கணக்கீட்டில் பெரும் குளறுபடிகள் நடந்திருப்பதாக மின்வாரியத் தலைமைப் பொறியாளரே அதிகாரப்பூர்வமாக ஒப்புக்கொண்டிருப்பது, முதல்வர் விஜய் அரசின் ஒட்டுமொத்த நிர்வாகத் தோல்வியைக் காட்டுகிறது. கணக்கீட்டுப் பிழைகளால் மக்கள் மீது இமாலயக் கட்டணம் சுமத்தப்பட்டுள்ள இந்தப் பிரச்சினையில், முதல்வர் தனிக்கவனம் செலுத்திப் போர்க்கால அடிப்படையில் உடனடியாகத் தீர்வு காண வேண்டும் என வலியுறுத்துகிறேன்.

மின்கட்டணக் குளறுபடிகளால் பொதுமக்களிடமிருந்து தவறாக வசூலிக்கப்பட்ட கூடுதல் தொகையை மின்வாரியம் உடனடியாகத் திருப்பித் தர வேண்டும். இக்குளறுபடிகளுக்கு நிரந்தரத் தீர்வு காணும் வகையில் சிறப்புத் தணிக்கை (Special Audit) ஒன்றைத் தவெக அரசு உடனடியாகத் தொடங்க வேண்டும். மின்வாரியத்தின் இப்பிரச்சினைகளைச் சீரமைத்து மக்களின் நிதிச் சுமையைக் குறைக்கத் தவறினால், பாஜக சார்பில் ஒட்டுமொத்த மக்களைத் திரட்டிப் பெரும் போராட்டங்கள் முன்னெடுக்கப்படும் என்று தெரிவித்துள்ளார்.