மதுரையில் சித்திரை திருவிழா தேரோட்டம் கோலாகலம் : லட்சக்கணக்கான பக்தர்கள் குவிந்தனர்!

உலகப்புகழ் பெற்ற மதுரை மீனாட்சி அம்மன் கோவில் சித்திரை திருவிழாவின் 11-ம் நாளான இன்று, சிகர நிகழ்ச்சிகளில் ஒன்றான தேரோட்டம் மிக விமரிசையாக நடைபெற்றது. ‘அரகரா... சிவசிவா...’ முழக்கங்களுக்கு இடையே லட்சக்கணக்கான பக்தர்கள் வடம் பிடித்துத் தேரை இழுத்தனர்.

கடந்த 19-ம் தேதி கொடியேற்றத்துடன் தொடங்கிய இவ்விழாவில், பட்டாபிஷேகம், திக்கு விஜயம் மற்றும் திருக்கல்யாண வைபவங்கள் நிறைவடைந்த நிலையில், இன்று தேரோட்டம் நடைபெற்றது. அதிகாலை 5 மணிக்கு சுந்தரேசுவரர் - பிரியாவிடை அம்மன் பெரிய தேரிலும், மீனாட்சி அம்மன் சிறிய தேரிலும் எழுந்தருளினர். காலை 6 மணிக்கு சிறப்புப் பூஜைகளுக்குப் பிறகு, பக்தர்கள் வடம் பிடித்து இழுக்க தேரோட்டம் கோலாகலமாகத் தொடங்கியது.

தேரோட்டத்தின் முன்னே அலங்கரிக்கப்பட்ட யானை கம்பீரமாகச் செல்ல, அதைத் தொடர்ந்து விநாயகர், முருகப்பெருமான் மற்றும் நாயன்மார்கள் சப்பரங்களில் வலம் வந்தனர். மாசி வீதிகளில் கூடியிருந்த லட்சக்கணக்கான பக்தர்கள், சங்கு முழங்கியபடியும் இசை வாத்தியங்கள் முழங்கியபடியும் பக்திப் பரவசத்துடன் தேரை இழுத்துச் சென்றனர்.

மீனாட்சி அம்மன் கோவில் விழா நிறைவடையும் தருவாயில், வைணவத் திருவிழா களைகட்டத் தொடங்கியுள்ளது. இன்று மாலை அழகர் கோவிலில் இருந்து கள்ளழகர் மதுரை நோக்கிப் புறப்படுகிறார். நாளை (ஏப்ரல் 30) மதுரை மூன்றுமாவடியில் கள்ளழகரை வரவேற்கும் ‘எதிர்சேவை’ நிகழ்ச்சி நடைபெற உள்ளது. நாளை மறுநாள் (மே 1) விழாவின் முத்தாய்ப்பு நிகழ்ச்சியாக, வைகை ஆற்றில் கள்ளழகர் தங்கக் குதிரை வாகனத்தில் இறங்கும் வைபவம் நடைபெறுகிறது.

தமிழகம் மட்டுமின்றி, வெளி மாநிலங்கள் மற்றும் வெளிநாடுகளில் இருந்தும் லட்சக்கணக்கான பக்தர்கள் மதுரையில் குவிந்துள்ளதால், மாநகரம் முழுவதும் பலத்த போலீஸ் பாதுகாப்பு போடப்பட்டுள்ளது. மாசி வீதிகள் மற்றும் வைகை ஆற்றங்கரைப் பகுதிகளில் கண்காணிப்புப் பணிகளும் தீவிரப்படுத்தப்பட்டுள்ளன.