ஆட்டோ டிரைவர் கொலை: வக்கீலுக்கு போலீஸ் வலை

தென்காசி அருகே ஆட்டோ டிரைவரை கொலை தொடர்பாக  வக்கீலை போலீசார் வலைவீசி தேடி வருகின்றனர்.

தென்காசி அருகே உள்ள அழகப்பபுரத்தைச் சேர்ந்தவர் ஆறுமுகம் மகன் ராமகிருஷ்ணன் (41), ஆட்டோ டிரைவர். இவரது உறவினர் அதே ஊரைச் சேர்ந்த சதீஷ்குமார். இவர் வக்கீலாக உள்ளார். இவர்கள் இருவருக்கும் இடையே ஏற்கனவே முன்விரோதம் இருந்துள்ளது. நேற்று இரவு ராமகிருஷ்ணனின் வீட்டின் முன்பு இருவருக்கும் இடையே தகராறு ஏற்பட்டது.

தகராறு முற்றியதில் சதீஷ்குமார், ராமகிருஷ்ணனை கீழே தள்ளியதாக கூறப்படுகிறது. இதில் ராமகிருஷ்ணனுக்கு தலையில் பலத்த காயம் ஏற்பட்டது. மேலும் சதீஷ்குமார் அவரை காலால் மிதித்ததாகவும் கூறப்படுகிறது. இதில் படுகாயமடைந்த ராமகிருஷ்ணனை செங்கோட்டை அரசு மருத்துவமனையில் சிகிச்சைக்காக சேர்க்கப்பட்டார்.  பின்னர் அங்கிருந்து அவர் மேல்சிகிச்சைக்காக   தென்காசி அரசு மருத்துவமனைக்கு கொண்டு வரப்பட்டார். ஆனால் வரும் வழியில் ராமகிருஷ்ணன் பரிதாபமாக இறந்தார்.

இந்த கொலை குறித்து தகவல் அறிந்த தென்காசி போலீஸ் இன்ஸ்பெக்டர் பாலமுருகன் சம்பவ இடத்திற்கு விரைந்து சென்று விசாரணை நடத்தினார். ராமகிருஷ்ணனின் உடல் பிரேத பரிசோதனைக்காக தென்காசி அரசு மருத்துவமனையில்  வைக்கப்பட்டது. இதுதொடர்பாக போலீசார் வழக்குப்பதிவு செய்து வக்கீல் சதீஷ்குமாரை  வலைவீசி தேடி வருகின்றனர்.