தூத்துக்குடி அரசு மருத்துவமனையில் மதமாற்றம்? – இந்து மக்கள் கட்சி சார்பில் முதல்வரிடம் புகார் மனு!

தூத்துக்குடி அரசு மருத்துவக் கல்லூரி மருத்துவமனையில் நோயாளிகளிடம் மதமாற்றம் செய்வதை தடுக்க வேண்டும் என்று இந்து மக்கள் கட்சி சார்பில் மருத்துவமனை முதல்வரிடம் (Dean) கோரிக்கை மனு அளிக்கப்பட்டது.

தூத்துக்குடி  அரசு மருத்துவக் கல்லூரி மருத்துவமனையில் உள்நோயாளிகளாக அனுமதிக்கப்பட்டுள்ளவர்களிடம், சில அமைப்புகள் திட்டமிட்டு மதமாற்றத்தில் ஈடுபட்டு வருவதாக இந்து மக்கள் கட்சி குற்றம் சாட்டியுள்ளது. மருத்துவமனை முதல்வரிடம் அளித்த மனுவில், "நோயாளிகளின் உறவினர்களுக்கு வார்டுகளுக்குள் செல்ல பல்வேறு கட்டுப்பாடுகள் விதிக்கப்படுகின்றன. 

ஆனால், மதமாற்றக் குழுவினரை மட்டும் பாதுகாவலர்களும், சில பணியாளர்களும் கையூட்டுப் பெற்றுக்கொண்டு வார்டுகளுக்குள் அனுமதிப்பதாகத் தெரிகிறது. ஸ்ட்ரெச்சர் தள்ளுவது முதல் சிறிய பணிகளுக்குக் கூட நோயாளிகளிடம் பணம் வசூலிக்கப்படும் நிலையில், இத்தகைய சட்டவிரோதச் செயல்களுக்கு உடந்தையாக இருப்பது கண்டிக்கத்தக்கது. மருத்துவமனை வளாகத்திற்குள் அத்துமீறி நுழைந்து மதப்பிரச்சாரம் செய்பவர்கள் மீது கடுமையான குற்றவியல் நடவடிக்கை எடுக்க வேண்டும்.

மனுவைப் பெற்றுக்கொண்ட மருத்துவமனை முதல்வர், இந்தப் புகார் குறித்து உடனடியாக ஆய்வு செய்து உரிய நடவடிக்கை எடுப்பதாக உறுதியளித்தார். மேலும் மருத்துவமனை வளாகத்தில் மதப்பிரச்சாரம் செய்யக்கூடாது என்பதை வலியுறுத்தி எச்சரிக்கைப் பதாகைகள் வைக்கப்படும். விதிகளை மீறி மதமாற்றத்தில் ஈடுபடுபவர்கள் பிடிபட்டால், அவர்கள் மீது காவல்துறை மூலம் சட்டப்பூர்வ நடவடிக்கை எடுக்கப்படும் எனத் தெரிவித்தார்.

இந்த நிகழ்வில் இந்து மக்கள் கட்சியின் மாநிலச் செயலாளர் வசந்தகுமார், மாநிலத் துணைத் தலைவர் ராமகுணசீலன், மாவட்ட அமைப்பாளர் சுடலைமணி, நைனா மற்றும் நிர்வாகிகள் இராஜவேல், சிம்பு கண்ணன் உள்ளிட்டப் பலர் கலந்து கொண்டனர்.