காதல் திருமணம் செய்த வாலிபரின் வீடு புகுந்து மிரட்டல்: பெண்ணின் சகோதரன் கைது!

சாத்தான்குளம் அருகே காதல் திருமணம் செய்த வாலிபரின் வீடுபுகுந்து மிரட்டல் விடுத்த பெண்ணின் சகோதரனை போலீசார் கைது செய்தனர்.

தூத்துக்குடி மாவட்டம், சாத்தான்குளம் அருகே பூவன்விளை கிராமத்தை சேர்ந்தவர் இசக்கிமுத்து (60). இவருக்கு மனைவி, 4 மகன்கள் மற்றும் ஒரு மகள் உள்ளனர். மூத்த மகன் விக்னேஷ் கடந்த ஆண்டு அதே பகுதியை சேர்ந்த செந்தில்குமார் மகள் ரட்சணி என்பவரை காதலித்து திருமணம் செய்தார். இதனால் இருவரது குடும்பத்தினருக்கும் பிரச்சினை ஏற்பட்டு முன்விரோதம் இருந்து வந்தது. 

இந்நிலையில் சம்பவத்தன்று பெண்ணின் உடன்பிறந்த அண்ணன் கிஷோர் குமார், இசக்கிமுத்து வீட்டிற்கு சென்று உங்களின் மகன் எனது தங்கையை ஏமாற்றி திருமணம் செய்து விட்டதாக கூறி தகராறு செய்துள்ளார். மேலும், வீட்டின் கதவை அரிவாளால் தாக்கி சேதப்படுத்தி கொலை மிரட்டல் விடுத்தாராம். இதுகுறித்து இசக்கிமுத்து தட்டார்மடம் போலீசில் புகார் அளித்தார். இதன்பேரில் போலீசார் வழக்குப்பதிவு செய்து, வீடு புகுந்து கொலைமிரட்டல் விடுத்த கிஷோர் குமாரை கைது செய்தனர்.