நியூயார்க் புரூக்ளின் பாலத்தில் பயங்கர தீ விபத்து: சுதந்திர தினக் கொண்டாட்டத்தில் பரபரப்பு!

அமெரிக்காவின் 250-ஆவது சுதந்திர தினக் கொண்டாட்டங்களின் ஒரு பகுதியாக நியூயார்க் நகரில் உள்ள புகழ்பெற்ற புரூக்ளின் பாலத்தில் நடைபெற்ற பிரமாண்ட வாணவேடிக்கை நிகழ்ச்சியின் போது திடீரென பயங்கர தீ விபத்து ஏற்பட்டது.

அமெரிக்காவின் 250-ஆவது சுதந்திர தினம் கடந்த ஜூலை 4-ஆம் தேதி நாடெங்கும் கொண்டாடப்பட்டது. இதனை முன்னிட்டு அமெரிக்க அரசு சார்பில் 'சுதந்திரம் 250' (Freedom 250) என்ற பெயரில் நாடு முழுவதும் பல்வேறு சிறப்பு நிகழ்ச்சிகள் ஒருங்கிணைக்கப்பட்டு வருகின்றன. தலைநகர் வாஷிங்டனில் கடந்த 4-ஆம் தேதி வெள்ளை மாளிகை முன்பு நடைபெற்ற பிரமாண்ட அரசியல் பேரணியில் ஜனாதிபதி டிரம்ப் முறைப்படி இந்தத் தேசிய அளவிலான விழாவைத் தொடங்கி வைத்தார்.

இந்தத் தொடர் கொண்டாட்டங்களின் ஒரு பகுதியாக, நியூயார்க் நகரின் முக்கிய அடையாளங்களுள் ஒன்றான புரூக்ளின் பாலத்தில் பிரமாண்ட வாணவேடிக்கை நிகழ்ச்சிக்கு ஏற்பாடு செய்யப்பட்டிருந்தது. வாணவேடிக்கை விறுவிறுப்பாக நடைபெற்றுக் கொண்டிருந்த வேளையில், பாலத்தின் ஒரு பகுதியில் திடீரென எதிர்பாராத விதமாகப் பயங்கர தீ விபத்து ஏற்பட்டது. பாலத்திலிருந்து வானை நோக்கிப் பிரமாண்ட கரும்புகை மூட்டமும், அசுர வேகத்தில் தீப்பிழம்புகளும் எழும்பியதால் அப்பகுதி முழுவதும் பெரும் பரபரப்பும் பதற்றமும் நிலவியது.

இதுகுறித்து தகவல் அறிந்தவுடன் சம்பவ இடத்திற்குப் பல வாகனங்களில் விரைந்து வந்த தீயணைப்பு வீரர்கள், தண்ணீரைப் பீய்ச்சியடித்து நீண்ட நேரம் கடுமையாகப் போராடி பாலத்தில் பரவிய தீயை முழுமையாகக் கட்டுக்குள் கொண்டு வந்து அணைத்தனர். வாணவேடிக்கை நிகழ்ச்சியின் போது பாதுகாப்பு முன்னெச்சரிக்கை நடவடிக்கையாகப் பொதுமக்கள் அனைவரும் பாலத்திலிருந்து குறிப்பிட்ட தொலைவில் நிறுத்தப்பட்டிருந்ததால், இந்த பயங்கர விபத்தில் நல்வாய்ப்பாக எந்தவித உயிர்ச்சேதமும் ஏற்படாமல் தவிர்க்கப்பட்டது என நியூயார்க் நகரப் பாதுகாப்புத் துறையினர் தெரிவித்துள்ளனர்.