இந்தியப் பாரம்பரிய உடையில் பிரதமர் மோடியை ஆச்சரியப்படுத்திய நெதன்யாகு!

இரண்டு நாள் அரசுமுறைப் பயணமாக இஸ்ரேல் சென்றுள்ள இந்தியப் பிரதமர் நரேந்திர மோடிக்கு, அந்நாட்டுப் பிரதமர் பெஞ்சமின் நெதன்யாகு இந்தியப் பாரம்பரிய உடையணிந்து உற்சாக வரவேற்பு அளித்தார்.

பிரதமர் மோடி நேற்று காலை டெல்லியில் இருந்து தனி விமானம் மூலம் இஸ்ரேலுக்குப் புறப்பட்டார். அவருடன் உயர்மட்டக் குழுவினரும் சென்றிருந்தனர். இஸ்ரேலின் பென் குரியன் சர்வதேச விமான நிலையத்தைச் சென்றடைந்த அவரை, அந்நாட்டுப் பிரதமர் பெஞ்சமின் நெதன்யாகு மற்றும் அவரது மனைவி சாரா நெதன்யாகு ஆகியோர் நேரில் சென்று வரவேற்றனர். பிரதமர் மோடி இஸ்ரேல் நாட்டிற்குப் பயணம் மேற்கொள்வது இது இரண்டாவது முறையாகும்.

நேற்று மாலை இஸ்ரேல் நாடாளுமன்றமான 'நெசெட்'-டில் (Knesset) பிரதமர் மோடி உரையாற்றினார். இதன் மூலம் இஸ்ரேல் நாடாளுமன்றத்தில் உரையாற்றிய முதல் இந்தியப் பிரதமர் என்ற பெருமையை அவர் பெற்றார். அவரது உரைக்குப் பிறகு, அவருக்கு அந்நாட்டின் உயரிய 'நெசெட் சபாநாயகர்' பதக்கம் வழங்கப்பட்டது. இதனை நாடாளுமன்றச் சபாநாயகர் அமீர் ஒகானா வழங்கிக் கௌரவித்தார். இந்தப் பதக்கத்தைப் பெறும் முதல் இந்தியப் பிரதமரும் மோடியே ஆவார்.

நேற்றிரவு பிரதமர் மோடிக்கு, நெதன்யாகு சிறப்பு விருந்து அளித்தார். அப்போது, தனது நண்பரான மோடியை ஆச்சரியப்படுத்தும் விதமாக, நெதன்யாகு இந்தியாவின் பாரம்பரிய உடையை அணிந்து வந்து அவரை வரவேற்றார்.

இது குறித்து நெதன்யாகு தனது 'எக்ஸ்' (X) வலைதளப் பக்கத்தில் இந்தியில் பதிவிட்டுள்ளதாவது: "எங்களது இரவு விருந்துக்கு முன்னதாக, இந்தியாவின் பாரம்பரிய உடையை அணிந்து எனது நண்பர் பிரதமர் மோடியை நான் ஆச்சரியப்படுத்தினேன்."

இப்பயணத்தின் ஒரு பகுதியாக, இஸ்ரேல் ஜனாதிபதி ஈசாக் ஹெர்ஜோக்கையும் பிரதமர் மோடி சந்தித்துப் பேச உள்ளார். மேலும், இஸ்ரேலில் வசிக்கும் இந்திய வம்சாவளியினரைச் சந்தித்து அவர்களிடையே உரையாடவும் அவர் திட்டமிட்டுள்ளார்.