ஜோர்டானில் முதியோர் காப்பகத்தில் தீ; 6 பேர் பலி: 50 பேர் படுகாயம்!

ஜோர்டான் தலைநகர் அம்மானில் ஒரு முதியோர் காப்பகம் செயல்படுகிறது. இங்கு 100-க்கும் மேற்பட்ட முதியவர்கள் பராமரிக்கப்பட்டு வருகின்றனர். இந்த காப்பகத்தின் ஒரு அறையில் திடீரென தீப்பிடித்தது. பின்னர் மளமளவென மற்ற பகுதிகளுக்கும் தீ வேகமாக பரவியது. இதனால் அந்த பகுதி முழுவதும் கரும்புகை மண்டலமாக காட்சியளித்தது. இதனையடுத்து சம்பவ இடத்துக்கு தீயணைப்பு வீரர்கள் விரைந்தனர். 

அவர்கள் அங்கு சென்று தண்ணீரை பீய்ச்சியடித்தனர். எனவே சில மணி நேர போராட்டத்துக்கு பிறகு தீ கட்டுக்குள் கொண்டு வரப்பட்டது. மற்றொருபுறம் அந்த காப்பகத்தில் சிக்கிய முதியவர்களை மீட்கும் பணியும் துரிதமாக நடைபெற்றது. எனினும் இந்த தீ விபத்தில் 6 பேர் உடல் கருகி பரிதாபமாக உயிரிழந்தனர். மேலும் 50 பேருக்கு படுகாயம் ஏற்பட்டது. மீட்பு படையினர் அவர்களை மீட்டு அருகில் உள்ள மருத்துவமனையில் அனுமதித்தனர். 

அங்கு அவர்களுக்கு தீவிர சிகிச்சை அளிக்கப்பட்டு வருகிறது. அவர்களில் பலரது நிலைமை கவலைக்கிடமாக இருப்பதால் பலி எண்ணிக்கை மேலும் உயரும் என அஞ்சப்படுகிறது. இதுகுறித்து போலீசார் வழக்கு பதிவு செய்து விசாரணை நடத்தி வருகின்றனர். முதல்கட்ட விசாரணையில் மின்கசிவால் தீ விபத்து ஏற்பட்டது தெரிய வந்துள்ளது.