ஆந்திராவில் பேருந்து - லாரி நேருக்கு நேர் மோதி கோர விபத்து: 13 பேர் பலி; 25 பேர் படுகாயம்!

ஆந்திரப் பிரதேச மாநிலம் மார்க்கபுரம் மாவட்டம் ராயவரம் பகுதியில் இன்று அதிகாலை நிகழ்ந்த கோர விபத்தில், தனியார் பேருந்தும் லாரியும் மோதிக்கொண்டதில் 13 பேர் உயிரிழந்தனர். 25 பேர் படுகாயமடைந்துள்ளனர்.

தெலங்கானா மாநிலம் நிர்மல் பகுதியிலிருந்து ஆந்திராவின் நெல்லூர் மாவட்டம் விஞ்சமூருக்கு 'ஹரிகிருஷ்ணா டிராவல்ஸ்' நிறுவனத்திற்குச் சொந்தமான தனியார் சுற்றுலாப் பேருந்து சென்று கொண்டிருந்தது. இன்று அதிகாலை சுமார் 5:30 மணியளவில் ராயவரம் பகுதியில் உள்ள வளைவு ஒன்றில் திரும்ப முயன்றபோது, எதிரே சரளைக் கற்களை ஏற்றிக்கொண்டு வந்த டிப்பர் லாரி மீது பேருந்து நேருக்கு நேர் மோதியது.

இந்த விபத்து குறித்து மார்க்கபுரம் மாவட்டப் பொறுப்பு ஆட்சியர் பி. ராஜா பாபு தெரிவிக்கையில்: "பேருந்தில் பயணித்த 41 பேரில் 13 பேர் சம்பவ இடத்திலேயே உயிரிழந்தனர். காயமடைந்த 25 பேர் மார்க்கபுரம் அரசு மருத்துவமனையில் அனுமதிக்கப்பட்டுள்ளனர். இதில் 10 பேர் பலத்த காயமடைந்துள்ள நிலையில், 5 பேரின் நிலைமை கவலைக்கிடமாக இருப்பதால் அவர்கள் குண்டூர் அரசு பொது மருத்துவமனைக்கு மாற்றப்பட்டுள்ளனர்."

உதவி எண்கள்: பாதிக்கப்பட்டவர்களின் விவரங்களை அறிய மாவட்ட நிர்வாகம் சார்பில் கட்டுப்பாட்டு அறைகள் அமைக்கப்பட்டுள்ளன:

மார்க்கபுரம்: 6304285613, 9985733999, 7989537285, 9703578434

நெல்லூர்: 7995575699, 0861-2331261