முகேஷ் அம்பானிக்கு கொலை மிரட்டல்: குஜராத், தெலுங்கானாவில் 2 பேர் கைது!

தொழில் அதிபர் முகேஷ் அம்பானிக்கு தொடர்ந்து கொலை மிரட்டல் விடுத்த 2 வாலிபர்களை குஜராத், தெலுங்கானாவில் வைத்து போலீசார் கைது செய்தனர்.

உலக பணக்காரர்களில் ஒருவரான பிரபல தொழில் அதிபர் முகேஷ் அம்பானி. மும்பை வால்கேஷ்வரில் உள்ள அண்டிலா என்ற ஆடம்பர அடுக்குமாடி கட்டிடத்தில் வசித்து வருகிறார். கடந்த மாதம் 27-ந்தேதி முகேஷ் அம்பானியின் நிறுவனத்துக்கு இ-மெயில் ஒன்று வந்தது. அதில், ரூ.20 கோடி கேட்டு முகேஷ் அம்பானிக்கு கொலை மிரட்டல் விடுக்கப்பட்டு இருந்தது. பணம் தரவில்லை எனில் முகேஷ் அம்பானியை சுட்டுக்கொலை செய்து விடுவேன் என மர்மநபர் இ-மெயிலில் மிரட்டல் விடுத்து இருந்தார்.

கொலை மிரட்டல் இ-மெயில் குறித்து மும்பை காவ்தேவி போலீசில் முகேஷ் அம்பானியின் பாதுகாப்பு அதிகாரி புகார் அளித்தார். அதன்பேரில் போலீசார் வழக்கு பதிவு செய்து விசாரணை நடத்தி வந்தனர். இதேபோல மறுநாளில் மீண்டும் இ-மெயில் மூலம் ரூ.200 கோடி கேட்டு முகேஷ் அம்பானிக்கு கொலை மிரட்டல் விடுக்கப்பட்டு இருந்தது. இந்தநிலையில் கடந்த திங்கட்கிழமை 3-வது தடவையாக இ-மெயிலில் முகேஷ் அம்பானிக்கு கொலை மிரட்டல் விடுக்கப்பட்டு இருந்தது. இந்த முறை மர்மநபர் ரூ.400 கோடி கேட்டு மிரட்டல் விடுத்து இருந்தார். 8 நாட்களில் 3-வது தடவையாக வந்த இ-மெயில் அதிர்ச்சியை ஏற்படுத்தியது.

இதைத்தொடர்ந்து முகேஷ் அம்பானியின் பாதுகாப்பு அதிகரிக்கப்பட்டது. மேலும் போலீசார் இந்த இ-மெயில் தொடர்பாக சைபர் குற்றப்பிரிவு போலீசாருடன் இணைந்து தீவிர விசாரணை நடத்தினர். இதில் 2 வேறுபட்ட இ-மெயிலில் இருந்து கொலை மிரட்டல்கள் வந்ததை போலீசார் கண்டறிந்தனர். இதில் ஒன்று தெலுங்கானா மாநிலத்தில் இருந்தும், மற்றொன்று குஜராத்தில் இருந்து வந்ததும் கண்டுபிடிக்கப்பட்டது.

இதைத்தொடர்ந்து தெலுங்கானா விரைந்த மும்பை போலீசார் அம்மாநில போலீசாரின் உதவியுடன் தீவிர தேடுதல் வேட்டை நடத்தி மிரட்டல் இ-மெயில் அனுப்பிய கணேஷ் வன்பார்தி(வயது19) என்ற வாலிபரை பிடித்து கைது செய்தனர். இதேபோல குஜராத்தில் இருந்து இ-மெயிலில் முகேஷ் அம்பானிக்கு கொலை மிரட்டல் விடுத்த ஷதாப் கான்(21) என்ற வலிபரையும் கைது செய்தனர். இவர்கள் 2 பேர் மீதும் போலீசார் வழக்குப்பதிவு செய்து, தீவிர விசாரணை நடத்தி வருகின்றனர்.