பெண் பத்திரிகையாளர் மீது அத்துமீறல்: சுரேஷ் கோபி மீது போலீசார் வழக்குப்பதிவு

பெண் பத்திரிகையாளரிடம் அத்துமீறியதாக நடிகர் சுரேஷ் கோபி மீது போலீசார் வழக்குப்பதிவு செய்துள்ளனர்.

மலையாள சினிமாவின் முன்னணி நடிகரான சுரேஷ் கோபி, தமிழில் ‘நிரபராதி', ‘கற்பூர முல்லை', ‘தீனா', ‘சமஸ்தானம்', ‘ஐ', ‘தமிழரசன்' படங்களில் நடித்துள்ளார். சினிமா தாண்டி அரசியலிலும் ஈடுபட்டு வருகிறார். கடந்த நாடாளுமன்ற தேர்தலில் திருச்சூர் தொகுதியில் பா.ஜ.க. சார்பில் களமிறங்கினார். அதில் தோல்வி அடைந்தார்.

இந்தநிலையில் நிகழ்ச்சி ஒன்றில் பங்கேற்ற சுரேஷ் கோபியிடம், நாடாளுமன்ற தேர்தல் குறித்தும், திருச்சூரில் மீண்டும் போட்டியிடுவது குறித்தும் கேள்விகள் கேட்கப்பட்டது. இதில் பெண் நிருபர் ஒரு கேள்வி எழுப்பியபோது, அவரது தோள்பட்டையை பிடித்து சுரேஷ் கோபி பதில்அளித்தார்.இதனால் பதறி போன அந்த பெண் சற்று பின்வாங்க, மீண்டும் அவரது தோள்பட்டையை சுரேஷ் கோபி பிடிக்க முயன்றார். இதனால் அதிர்ச்சியடைந்த அந்த பெண் நிருபர் சுரேஷ் கோபியின் கையை தட்டிவிட்டார்.

சுரேஷ் கோபியின் இந்த நடவடிக்கை குறித்து கேரள பத்திரிகையாளர்கள் சங்கம் அளித்த புகாரின் பேரில், போலீசார் வழக்குப்பதிவு செய்துள்ளனர். இதுகுறித்து சுரேஷ் கோபி கூறும்போது, ‘அந்த பெண் செய்தியாளர், என் வழியை மறைத்து நின்றதால், அவரை அங்கிருந்து நகர்த்த முயன்றேன். ஒரு தந்தையாக, அந்த பெண்ணிடம் மன்னிப்பு கேட்க தயாராக உள்ளேன்’ என்றார்.சுரேஷ் கோபி கடந்த 2019-ம் ஆண்டு தேர்தல் பிரசாரத்தின் போது கர்ப்பிணி பெண்ணின் வயிற்றை தொட்டது சர்ச்சையை ஏற்படுத்தியது குறிப்பிடத்தக்கது.