சிபிஎஸ்இ பாடப்புத்தகங்களில் இந்தியாவுக்குப் பதிலாக பாரத் : என்சிஇஆர்டி குழு பரிந்துரை

பள்ளி பாடப்புத்தகங்களில் 'இந்தியா' என்பதற்குப் பதிலாக 'பாரத்' என மாற்ற தேசிய கல்வி ஆராய்ச்சி மற்றும் பயிற்சி கவுன்சில் (என்சிஇஆர்டி) குழு பரிந்துரைத்துள்ளது.

கடந்த மாதம் தில்லியில் நடைபெற்ற ஜி20 மாநாட்டின் விருந்துக்கான அழைப்பிதழில் ‘இந்திய குடியரசுத் தலைவா்’ என்பதற்குப் பதிலாக ‘பாரத குடியரசுத் தலைவா்’ என அச்சிடப்பட்டது. இதற்கு எதிா்க்கட்சிகள் கடும் கண்டனம் தெரிவித்தன.

அதுபோல, இந்தோனேசியா தலைநகா் ஜகாா்தாவில் நடைபெற்ற 20-ஆவது ஆசியான்-இந்தியா உச்சி மாநாட்டில் பிரதமா் மோடியின் நிகழ்ச்சி நிரலில் 'இந்திய பிரதமர்' என்பதற்கு பதிலாக 'பாரத பிரதமர்' என்று அச்சிடப்பட்டது.  இந்தியாவை 'பாரதம்' என பெயர் மாற்றம் செய்வதற்கு பல்வேறு தரப்பினரும் எதிர்ப்புக் குரல் கொடுத்தனர். 

இந்நிலையில், சிபிஎஸ்இ பாடப் புத்தகங்களில் 'இந்தியா' என்பதற்குப் பதிலாக 'பாரத்' என பெயர் மாற்றம் செய்ய தற்போது தேசிய கல்வி ஆராய்ச்சி மற்றும் பயிற்சி கவுன்சில் (என்சிஇஆர்டி) குழு பரிந்துரை செய்துள்ளது. இதற்கு கல்வியாளர்கள் பலரும் எதிர்ப்பு தெரிவித்து சமூக வலைத்தளங்களில் பதிவிட்டு வருகின்றனர். 

மேலும், 'பண்டைய வரலாறு' (Ancient History) என்பதற்குப் பதிலாக 'பாரம்பரிய வரலாறு' (Classical History) என்று மாற்றவும் என்சிஇஆர்டி குழு பரிந்துரைத்துள்ளதாகவும் அந்த குழுவின் தலைவர் சி.ஐ. ஐசக் தெரிவித்துள்ளார். அதுபோல வரலாறுகளில் தோல்விகள் குறித்து அதிகம் குறிப்பிடுவதற்குப் பதிலாக இந்துக்களின் வெற்றிகள் குறித்து அதிகம் இடம்பெற வேண்டும் என்றும் இந்திய அறிவு முறைக்கு (Indian Knowledge System) முக்கியத்துவம் கொடுக்கவும் குழு பரிந்துரைத்துள்ளது.