திருச்செந்தூர் அருள்மிகு சுப்பிரமணிய சுவாமி திருக்கோவில் அறங்காவலர் குழு நியமனத்தில் வெளிப்படைத்தன்மை இல்லை என்றும், இதில் உடனடியாகத் தலையிட்டு உரிய நடவடிக்கை எடுக்க வேண்டும் என்றும் பாஜக தூத்துக்குடி தெற்கு மாவட்டத் தலைவர் ஆர். சித்ராங்கதன் மாவட்ட ஆட்சியரிடம் மனு அளித்துள்ளார்.
மனுவில் கூறியுள்ளதாவது: "திருச்செந்தூர் அருள்மிகு சுப்பிரமணிய சுவாமி திருக்கோயில் அறங்காவலர் குழு நியமனம் தொடர்பாக வெளியிடப்பட்டுள்ள செய்தி பொதுமக்களிடையே பெரும் அதிர்ச்சியை ஏற்படுத்தியுள்ளது.
கடந்த 24-ஆம் தேதி வியாழக்கிழமை அன்று, எவ்வித வெளிப்படைத்தன்மையுமின்றி இரகசியமான முறையில் புதிய அறங்காவலர்களின் பதவியேற்பு நிகழ்வு நடைபெற்றுள்ளது. இப் பதவிக்காகத் தகுதியான 300-க்கும் மேற்பட்டோர் விண்ணப்பித்திருந்த நிலையில், அந்த விண்ணப்பங்கள் முறையாகப் பரிசீலிக்கப்படாமல் புறக்கணிக்கப்பட்டுள்ளன.
கல்வித் தகுதியும் நிர்வாகத் திறமையும் கொண்ட தகுதியான நபர்களின் வாய்ப்புகள் தட்டிப் பறிக்கப்பட்டுள்ளன. திருச்செந்தூர் தலத்தின் பாரம்பரிய வழக்கங்களை அறிந்த உள்ளூர் பகுதி சார்ந்த பக்தர்களின் பிரதிநிதித்துவத்தைத் தவிர்த்துவிட்டு, வெளிமாநில மற்றும் வெளிமாவட்ட நபர்களுக்கு முன்னுரிமை வழங்கப்பட்டுள்ளது ஏற்புடையதல்ல.
கடந்த காலங்களில் அறங்காவலர் குழுத் தலைவராகவும், பின்னர் இடைக்காலத் தக்கராகவும் இருந்தவரையே மீண்டும் அக்குழுவின் தலைவராகத் தொடர்ந்து நியமித்துள்ளனர். முந்தைய நிர்வாக முறைகேடுகள், சண்முக விலாச மண்டபம் அடைக்கப்பட்டு தரிசனத் தடை விதிக்கப்பட்டதால் பக்தர்கள் நீண்ட நேரம் காத்திருந்தமை போன்ற தொடர் பிரச்சினைகளுக்குக் காரணமான நபருக்கே மீண்டும் பொறுப்பு வழங்குவது அநீதியாகும்.
மேலும், அறங்காவலர்கள் நியமனத்தில் முறையற்ற நடைமுறைகளுக்குக் காரணமாக உள்ள கோயில் இணை ஆணையரின் செயல்பாடுகள் குறித்தும் உரிய விசாரணை நடத்தப்பட வேண்டும். இக்கோயிலில் சில மாதங்களுக்கு முன்பு போலி தரிசன டிக்கெட் வாயிலாகப் பல கோடி ரூபாய் ஊழல் நடைபெற்றதாக அறநிலையத்துறை அமைச்சர் தெரிவித்திருந்தார்.
தவறு செய்தவர்கள் மீது கடும் நடவடிக்கை எடுக்கப்படும் என உறுதியளிக்கப்பட்ட நிலையில், பழைய நிர்வாகிகளையே மீண்டும் நியமிக்கும்போது விசாரணை நியாயமாக நடைபெறுமா என்ற அச்சம் பக்தர்களிடையே நிலவுகிறது.
எனவே, மாவட்ட ஆட்சியர் அவர்கள் உடனடியாகத் தலையிட்டு, திருச்செந்தூர் கோயில் அறங்காவலர் குழு நியமனங்கள் குறித்து உரிய ஆய்வு செய்து, தகுதி வாய்ந்த விண்ணப்பதாரர்களின் உரிமைகளையும் பக்தர்களின் நலனையும் பாதுகாத்திட வேண்டும்" என மனுவில் வலியுறுத்தியுள்ளார்.