பொதுவெளியில் அரசியல் தலைவர்கள் பேசும் போது நாகரிகத்தையும் பொறுப்பையும் கடைப்பிடிக்க வேண்டும் என்றும், தமிழக அரசியல் கீழ்த்தரமான பேச்சுகளுக்கான போட்டியாக மாறி வருகிறது என்றும் ‘வீ தி லீடர்ஸ்’ அமைப்பின் தலைவர் அண்ணாமலை சாடியுள்ளார்.
தமிழகத்தில் நடைபெறவுள்ள இடைத்தேர்தல் பிரசாரத்தின் போது, எதிர்க்கட்சித் தலைவர் உதயநிதி மற்றும் அமைச்சர் ஆதவ் ஆகிய இருவரும் ஒருவரையொருவர் தரம் தாழ்ந்து அநாகரிகமாக விமர்சித்துப் பேசினர். இப் பேச்சுகள் அடங்கிய வீடியோ காட்சிகளைத் தனது இன்ஸ்டாகிராம் (Instagram) சமூக வலைதளப் பக்கத்தில் வெளியிட்டு ‘வீ தி லீடர்ஸ்’ அமைப்பின் தலைவர் அண்ணாமலை தனது கடுமையான கண்டனத்தைப் பதிவு செய்துள்ளார்.
அவர் வெளியிட்டுள்ள சமூக வலைதளப் பதிவில் தெரிவித்திருப்பதாவது: "பொதுவெளியில் யார் மிகவும் கீழ்த்தரமாகப் பேச முடியும் என்பதற்கான போட்டியாகத் தமிழக அரசியல் வேகமாக மாறி வருகிறது. நாட்டின் எதிர்காலமான நமது இளைஞர்கள் இத்தகைய பேச்சுகளை உன்னிப்பாகக் கவனித்துக் கொண்டிருக்கிறார்கள்.
தலைவர்களாகிய உங்களால் இளைஞர்களுக்கான சரியான பாதையைக் காட்ட முடியாவிட்டாலும் பரவாயில்லை; ஆனால் குறைந்தபட்சம் உங்களுடைய நாகரிகமற்ற, தரம் தாழ்ந்த நடத்தையினால் அவர்களை இருண்ட பாதைக்கு அழைத்துச் செல்லாதீர்கள்.
பொதுவெளியில் பேசும்போது அரசியல் தலைவர்கள் கண்ணியத்தையும், நாகரிகத்தையும், சமூகப் பொறுப்பையும் தவறாமல் கடைப்பிடிக்க வேண்டும்" என அண்ணாமலை வலியுறுத்தியுள்ளார்.