கன்னியாகுமரி மாவட்ட எல்லைச் சோதனைச் சாவடிகள் வழியாகச் சட்டவிரோதமாகக் கனிம வளங்களைப் பிற மாநிலங்களுக்குக் கடத்திச் செல்லும் வாகனங்கள் மீது கடும் நடவடிக்கை எடுக்கப்படும் என மாவட்ட ஆட்சித்தலைவர் மு. பிரதாப் எச்சரித்துள்ளார்.
கன்னியாகுமரி மாவட்ட எல்லைப் பகுதிகளான கோழிவிளை மற்றும் களியக்காவிளை ஆகிய இடங்களில் அமைந்துள்ள எல்லைச் சோதனைச் சாவடிகளில், மாவட்ட ஆட்சித்தலைவர் நேற்று (14.09.2026) இரவில் நேரில் சென்று திடீர் ஆய்வு மேற்கொண்டார்.
எவ்வித உரிய அனுமதியுமின்றிச் சட்டவிரோதமாகக் கனிம வளங்களைப் பிற மாநிலங்களுக்குக் கடத்திச் செல்வதாக வந்த புகார்களின் அடிப்படையில் இந்த ஆய்வு நடத்தப்பட்டது. குறிப்பாக, 12-க்கும் அதிகமான சக்கரங்களைக் கொண்ட கனரக வாகனங்கள் கனிம வளங்களை ஏற்றிச் செல்கின்றனவா என்பது குறித்தும், வாகனங்களின் வருகைப் பதிவேடுகள் மற்றும் தணிக்கைப் பதிவேடுகள் குறித்தும் ஆட்சியர் தீவிர ஆய்வு செய்தார்.
கனிம வளங்களைக் கொண்டு செல்லும் வாகனங்கள் அரசிடமிருந்து பெறப்பட்ட முறையான கனிம நகர்வு அனுமதிச் சீட்டு (Mineral Transit Pass) மற்றும் வாகனத்தின் எடைச் சான்றிதழைத் துல்லியமாக வைத்துள்ளனவா என்பதைப் பரிசோதிக்க வேண்டும். அனுமதி அளிக்கப்பட்ட அளவை விடக் கூடுதலாகக் கனிமங்களை ஏற்றி வரும் லாரிகளை உடனடியாகப் பறிமுதல் செய்ய வேண்டும்.
வருவாய்த்துறை, காவல் துறை மற்றும் கனிம வளத்துறை ஆகிய துறையினர் இணைந்து 24 மணி நேரமும் சுழற்சி முறையில் சோதனைச் சாவடிகளில் தீவிர கண்காணிப்பில் ஈடுபட வேண்டும். சட்டவிரோதக் கடத்தலில் ஈடுபடும் வாகன உரிமையாளர்கள் மற்றும் ஓட்டுநர்கள் மீது காவல் துறையில் வழக்குப் பதிவு செய்யப்படுவதோடு சட்டப்பூர்வமான கடுமையான நடவடிக்கைகள் எடுக்கப்படும்.
பொதுமக்கள் தங்கள் பகுதிகளில் சட்டவிரோதமாகக் கனிம வளங்களைக் கடத்திச் செல்வது தொடர்பாக ஏதேனும் தகவல்கள் அறிந்தால், உடனடியாக மாவட்ட நிர்வாகத்திற்குத் தெரியப்படுத்தலாம் என்றும், அதன்பேரில் உடனடி நடவடிக்கை எடுக்கப்படும் என்றும் மாவட்ட ஆட்சித்தலைவர் தெரிவித்துள்ளார்.