திரைப்பட இயக்குநர் ஷங்கர் மகள் திருமண விழா: முதல்வர் ஸ்டாலின் நேரில் வாழ்த்து

திரைப்பட இயக்குநர் ஷங்கரின் மகள் திருமண விழாவில் தமிழக முதல்வர் ஸ்டாலின் நேரில் கலந்து கொண்டு வாழ்த்து தெரிவித்தார் .

இந்தியத் திரையுலகின் பிரம்மாண்ட இயக்குனர் ஷங்கரின் மகள் ஐஸ்வர்யா ஷங்கர் - ரோஹித் தாமோதரன் திருமணம் கிழக்கு கடற்கரை சாலையில் உள்ள வெல்கம் ஹோட்டலில் நேற்று நடைபெற்றது. கரோனா பாதுகாப்பு கருதி மணமகன் மணமகளின் பெற்றோர் மற்றும் மிக முக்கிய சொந்தங்கள் மட்டுமே விழாவில் கலந்து கொண்டனர். 

திருமண நிகழ்ச்சியில் முதல்வர் மு.க.ஸ்டாலின், சுகாதாரத்துறை அமைச்சர்மா.சுப்பிரமணியன், நடிகரும் சட்டமன்ற உறுப்பினருமான உதயநிதி ஸ்டாலின் ஆகியோர் நேரில் கலந்துகொண்டு மணமக்களை வாழ்த்தினர். கரோனா பெருந்தொற்று படிப்படியாக குறைந்து இயல்புநிலை திரும்பியவுடன் முக்கியப் பிரமுகர்கள், திரையுலகத்தினர் மற்றும் உறவினர்கள், நண்பர்கள் என அனைவரையும் அழைத்து சிறப்பான முறையில் திருமண வரவேற்பு நிகழ்ச்சி நடத்த திட்டமிடப்பட்டுள்ளது.

இந்நிலையில் திருமணத்துக்கு வருகை தந்த முதல்வருக்கு நன்றி தெரிவித்து ஷங்கர் ட்வீட் செய்துள்ளார். அவர் கூறியதாவது: "மகளின் திருமணத்தில் முதல்வர் ஸ்டாலின் கலந்துகொண்டு வாழ்த்தியது மறக்க முடியாத ஆசிர்வாதம். இதற்கு நன்றி தெரிவித்துக்கொள்கிறேன். மணமக்களை வாழ்த்திய மா. சுப்ரமணியன், உதயநிதி ஸ்டாலின் ஆகியோருக்கும் நன்றி" என தெரிவித்துள்ளார்.