பிரான்ஸை 2-0 கணக்கில் வீழ்த்தியது ஸ்பெயின்: உலகக் கோப்பை கால்பந்து இறுதிப்போட்டிக்குத் தகுதி!

23-வது உலகக் கோப்பை கால்பந்து தொடரின் முதல் அரையிறுதி ஆட்டத்தில் பிரான்ஸ் அணியை 2-0 என்ற கோல் கணக்கில் வீழ்த்தி ஸ்பெயின் அணி இறுதிப்போட்டிக்கு முன்னேறியுள்ளது.

அமெரிக்காவின் டல்லாஸ் நகரில் நடைபெற்ற இப்போட்டியில் ஸ்பெயின் மற்றும் பிரான்ஸ் அணிகள் மோதின. ஆட்டத்தின் தொடக்க முதலே இரு அணி வீரர்களும் இலக்கைக் நோக்கிப் பந்துகளைச் செலுத்தினர். ஆட்டத்தின் 22-வது நிமிடத்தில் ஸ்பெயின் அணிக்குக் கிடைத்த பெனால்டி வாய்ப்பைப் பயன்படுத்தி, அந்த அணியின் வீரர் ஒயார்சபால் முதல் கோலை அடித்தார். இதனால் ஆட்டத்தின் முதல் பாதியில் ஸ்பெயின் அணி 1-0 என்ற கணக்கில் முன்னிலை பெற்றது. 

பிரான்ஸ் அணி பதில் கோல் அடிக்க மேற்கொண்ட முயற்சிகள் பலனளிக்கவில்லை. தொடர்ந்து நடைபெற்ற இரண்டாம் பாதி ஆட்டத்திலும் ஸ்பெயின் அணி வீரர்கள் ஆதிக்கத்தைச் செலுத்தினர். ஆட்டத்தின் 58-வது நிமிடத்தில் ஸ்பெயின் வீரர் பெட்ரோ போரோ இரண்டாவது கோலை பதிவு செய்தார். இதன் மூலம் ஸ்பெயின் அணி 2-0 என்ற கணக்கில் வலுவான முன்னிலையைப் பெற்றது. ஆட்ட நேர இறுதி வரை பிரான்ஸ் வீரர்களால் பதில் கோல் எதுவும் அடிக்க முடியவில்லை.

ஆட்ட நேர முடிவில் 2-0 என்ற கோல் கணக்கில் வெற்றி பெற்ற ஸ்பெயின் அணி உலகக் கோப்பை இறுதிப்போட்டிக்குத் தகுதி பெற்றது. தோல்வியடைந்த பிரான்ஸ் அணி 3-வது இடத்திற்கான போட்டியில் விளையாடவுள்ளது.