மூன்றாவது பிரசவத்திற்கும் ஓராண்டு மகப்பேறு விடுப்பு: அரசாணையை நிராகரித்து உயர் நீதிமன்றம் தீர்ப்பு!

» செய்திகள் - விளையாட்டு » தமிழகம்

மூன்றாவது பிரசவத்திற்கும் ஓராண்டு மகப்பேறு விடுப்பு: அரசாணையை நிராகரித்து உயர் நீதிமன்றம் தீர்ப்பு!

வியாழன் 30, ஏப்ரல் 2026 12:43:33 PM (IST)

அரசு பெண் ஊழியர்களின் மூன்றாவது பிரசவத்திற்கும் ஓராண்டு மகப்பேறு விடுப்பு வழங்கப்பட வேண்டும் என்றும், 12 வாரங்கள் மட்டுமே விடுப்பு வழங்கும் அரசின் தற்போதைய அரசாணை நீதிமன்றத் தீர்ப்புகளுக்கு எதிரானது என்றும் சென்னை உயர் நீதிமன்றம் அதிரடி கருத்தை தெரிவித்துள்ளது.

வழக்கின் பின்னணி: விழுப்புரம் மாவட்டம், திண்டிவனம் மோட்டார் வாகன விபத்து வழக்குகளுக்கான இழப்பீட்டு தீர்ப்பாயத்தில் பணியாற்றி வரும் சாய் நிஷா என்பவர், தனது மூன்றாவது பிரசவத்திற்காக 2026 பிப்ரவரி முதல் 2027 பிப்ரவரி வரை ஓராண்டு மகப்பேறு விடுப்பு கோரி விண்ணப்பித்திருந்தார்.

ஆனால், "மூன்றாவது பிரசவத்திற்கு 12 வாரங்கள் (சுமார் 3 மாதங்கள்) மட்டுமே விடுப்பு வழங்க முடியும்" என்ற தற்போதைய அரசாணையைக் குறிப்பிட்டு, மாவட்ட முதன்மை அமர்வு நீதிபதி அவரது கோரிக்கையை நிராகரித்தார். மேலும் ஏப்ரல் மாதத்திற்குள் பணிக்குத் திரும்ப வேண்டும் என்றும் உத்தரவிட்டார்.

உயர் நீதிமன்றத்தின் அதிரடி தீர்ப்பு:

இந்த உத்தரவை எதிர்த்து சாய் நிஷா சென்னை உயர் நீதிமன்றத்தில் மேல்முறையீடு செய்தார். இந்த வழக்கை விசாரித்த நீதிபதிகள் ஆர். சுரேஷ்குமார் மற்றும் என். செந்தில்குமார் அடங்கிய அமர்வு வழங்கிய தீர்ப்பில், மூன்றாவது பிரசவமும் முதல் இரு பிரசவங்களைப் போலவே வலியும், வேதனையும் அடங்கியதுதான். இதில் பாகுபாடு காட்ட முடியாது.

மூன்றாவது பிரசவத்திற்கு 12 வாரங்கள் மட்டுமே விடுப்பு வழங்க வேண்டும் என்ற அரசின் ஆணை, உச்ச நீதிமன்றம் மற்றும் உயர் நீதிமன்றத்தின் முந்தைய தீர்ப்புகளுக்கு எதிரானது. அரசின் இந்த அரசாணை நீதித்துறையைப் பணியாளர்களை எவ்விதத்திலும் கட்டுப்படுத்தாது. மனுதாரருக்கு ஓராண்டு காலம் மகப்பேறு விடுப்பு வழங்க வேண்டும் என விழுப்புரம் மாவட்ட முதன்மை அமர்வு நீதிபதிக்கு உயர் நீதிமன்றம் உத்தரவிட்டது.

இந்தத் தீர்ப்பு, மூன்றாவது முறையாகத் தாயாகும் அரசுப் பணியாளர்களுக்குப் பெரும் நிம்மதியை அளித்துள்ளது. அரசின் கொள்கை முடிவுகளைக் காட்டிலும், தாயின் ஆரோக்கியம் மற்றும் குழந்தையின் பராமரிப்பு சார்ந்த மனிதநேய அடிப்படையிலான தீர்ப்புகளே மேலோங்கி நிற்கும் என்பதை இந்த உத்தரவு மீண்டும் உறுதிப்படுத்தியுள்ளது.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து: