திமுக - காங்கிரஸ் கூட்டணி புதிய வரலாறு : முதல்வர் மு.க.ஸ்டாலின் பெருமிதம்!

தமிழக அரசியல் வரலாற்றிலேயே ஒரே கூட்டணி தொடர்ந்து நான்கு தேர்தல்களை (2019, 2021, 2024 மற்றும் தற்போது 2026) சந்திப்பது இதுவே முதல்முறை என்று முதல்வர் மு.க.ஸ்டாலின் பேசினார். 

பள்ளிக்கல்வித்துறை அமைச்சர் அன்பில் மகேஷ் பொய்யாமொழி இல்லத் திருமண விழாவைத் தலைமையேற்று நடத்தி வைத்த முதலமைச்சர் மு.க. ஸ்டாலின், திமுக - காங்கிரஸ் கூட்டணி குறித்தும் தமிழக அரசியல் வரலாறு குறித்தும் முக்கியக் கருத்துகளைப் பகிர்ந்து கொண்டார்.

அமைச்சர் அன்பில் மகேஷ் பொய்யாமொழி இல்லத் திருமண விழா இன்று சென்னையில் உற்சாகமாக நடைபெற்றது. முதலமைச்சர் மு.க. ஸ்டாலின் திருமணத்தை நடத்தி வைத்து மணமக்களை வாழ்த்தினார். இவ்விழாவில் முதலமைச்சரின் மனைவி துர்கா ஸ்டாலின், துணை முதலமைச்சர் உதயநிதி ஸ்டாலின் மற்றும் திமுகவின் முக்கிய நிர்வாகிகள், அமைச்சர்கள் பலர் கலந்துகொண்டனர்.

திருமண விழாவில் மணமக்களை வாழ்த்திப் பேசிய முதலமைச்சர் மு.க. ஸ்டாலின், அரசியல் களம் குறித்தும் உரையாற்றினார். அவர் பேசியதாவது:    "காங்கிரஸ் கட்சியுடனான தொகுதிப் பங்கீடு பேச்சுவார்த்தையை வெற்றிகரமாக முடித்துவிட்டு, அந்த மனநிறைவோடு இந்தத் திருமண விழாவிற்கு வந்திருக்கிறேன். அனைவரும் பாராட்டும் வகையில் எங்களது தேர்தல் கூட்டணி ஒப்பந்தம் அமைந்துள்ளது."

தமிழக அரசியல் வரலாற்றிலேயே ஒரே கூட்டணி தொடர்ந்து நான்கு தேர்தல்களை (2019, 2021, 2024 மற்றும் தற்போது 2026) சந்திப்பது இதுவே முதல்முறை. இது ஒரு மிகப்பெரிய வரலாற்றுச் சாதனை. கடந்த கால வரலாற்றைப் பார்த்தால், ஒரு சட்டமன்றத் தேர்தலுக்கு அமைந்த கூட்டணி, அடுத்த சட்டமன்றத் தேர்தல் வரை நீடித்தது இல்லை. ஆனால், திமுக தலைமையிலான இந்தக் கூட்டணி கொள்கை ரீதியாக ஒன்றிணைந்து தொடர்ந்து பயணிக்கிறது" என்று அவர் பெருமிதத்துடன் குறிப்பிட்டார்.

திமுக - காங்கிரஸ் கூட்டணி ஒப்பந்தம் கையெழுத்தாகியுள்ள நிலையில், விஜய்யின் தமிழக வெற்றிக் கழகம் (தவெக) இதுவரை எந்தக் கூட்டணியிலும் இணையாமல் தனித்து விடப்பட்டுள்ளதாக அரசியல் வட்டாரத்தில் விவாதங்கள் எழுந்துள்ளன.