தயாநிதி மாறனின் குற்றச்சாட்டு ஆதாரமற்றவை: சன் டி.வி. நெட்வொர்க் விளக்கம்

» செய்திகள் - விளையாட்டு » தமிழகம்

தயாநிதி மாறனின் குற்றச்சாட்டு ஆதாரமற்றவை: சன் டி.வி. நெட்வொர்க் விளக்கம்

வெள்ளி 20, ஜூன் 2025 4:12:32 PM (IST)

கலாநிதி மாறன் மீது தயாநிதி மாறன் முன்வைத்த குற்றச்சாட்டு ஆதாரமற்றவை என்று சன் டி.வி. நெட்வொர்க் நிர்வாகம் விளக்கம் அளித்துள்ளது.

திமுக எம்.பி. தயாநிதி மாறன், தனது அண்ணன் கலாநிதி மாறன் உட்பட எட்டு பேருக்கு எதிராக சட்ட நோட்டீஸ் அனுப்பியுள்ளார். இதில், சன் டி.வி. குழுமப் பங்குகளை கலாநிதி மாறன் மோசடியாகத் தனக்கு மாற்றிக் கொண்டதாகக் குற்றம்சாட்டப்பட்டுள்ளது.

முரசொலி மாறன் உடல்நிலை சரியில்லாதபோது, சட்ட விரோதமாக கோடிக்கணக்கான ரூபாய் மதிப்புள்ள பங்குகளை மாற்றியதாகவும், இதனால் குடும்ப உறுப்பினர்களுக்கு உரிய பங்கு கிடைக்கவில்லை என்றும் தயாநிதி மாறன் தனது நோட்டீஸில் குறிப்பிட்டுள்ளார்.

ஒரு வாரத்திற்குள் பங்குகளைத் திருப்பித் தராவிட்டால், சம்பந்தப்பட்ட மத்திய துறைகளிடம் புகார் அளித்து சன் குழும வணிகங்களை நிறுத்த நடவடிக்கை எடுப்பேன் என்றும், சிவில் மற்றும் கிரிமினல் நடவடிக்கைகளை மேற்கொள்வேன் என்று தயாநிதி மாறன் எச்சரித்துள்ளார்.

இதனால் இந்திய பங்குச் சந்தை நிஃப்டி (NSE) மற்றும் தேசிய பங்குச் சந்தை (BSE) ஆகியவற்றில் சிக்கல் ஏற்பட்டுவிடக் கூடாது என சன் டி.வி. நெட்வொர்க், இந்த குற்றச்சாட்டு ஆதாரமற்றவை என விளக்கக் கடிதம் அனுப்பியுள்ளது.

இந்த கடித்தில் கூறியிருப்பதாவது: 22 ஆண்டுகளுக்கு முன் தனியார் நிறுவனமாக செயல்பட்டபோது இந்தப் பிரச்னை ஏற்பட்டிருக்கலாம். அதற்கும் தற்போதைய நிகழ்வுக்கும் சம்பந்தமில்லை. இதுதொடர்பாக வெளியான செய்திகள் அனைத்தும் உண்மைக்குப் புறம்பானவை. தவறாக வழிநடத்தக் கூடியவை. வியூகத்தின் அடிப்படையில் இந்தச் செய்தி பரப்பப்படுகிறது. இது முற்றிலும் குடும்ப விவகாரம்.

சன் டிவியின் அனைத்து நடவடிக்கைகளும் முறையாக சட்டவிதிகளுக்கு உட்பட்டு தான் நடைபெற்றன. மேலும், தயாநிதி மாறன் முன்வைத்த குற்றச்சாட்டுகள் சன் டிவியின் அன்றாட நடவடிக்கையை ஒருபோதும் பாதிக்காது. அவர் குடும்ப உறுப்பினர் என்ற முறையில், இந்த விவகாரம் முற்றிலும் தனிப்பட்ட ரீதியிலானது. இவ்வாறு விளக்கக் கடிதத்தில் கூறப்பட்டுள்ளது.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து: