அம்பேத்கர் படத்துக்கு முதல்வர் ஸ்டாலின் மரியாதை: சமத்துவ நாள் உறுதிமொழி ஏற்பு!

சட்டமேதை அம்பேத்கரின் பிறந்த நாளை முன்னிட்டு அவரது திருவுருவப் படத்துக்கு தமிழக முதல்வர் மு.க. ஸ்டாலின் மலர்தூவி மரியாதை செலுத்தினார்.

சட்டமேதை அம்பேத்கரின் பிறந்த நாளை முன்னிட்டு சென்னை ராஜா அண்ணாமலைபுரத்தில் அமைந்துள்ள அம்பேத்கா் மணிமண்டபத்தில் உள்ள அவரது உருவச் சிலைக்கு தமிழக அரசின் சாா்பில், மாலை அணிவித்து மரியாதை செலுத்தப்பட்டது. அம்பேத்கரின் திருவுருவப் படத்துக்கு மலர்தூவி மரியாதை செலுத்திய முதல்வர் மு.க.ஸ்டாலின், சமத்துவ நாள் உறுதிமொழியை ஏற்றார்.

இந்த நிகழ்வில் துணை முதல்வர் உதயநிதி ஸ்டாலின், அமைச்சர்கள், விசிக தலைவர் திருமாவளவன் உள்ளிட்டோர் பங்கேற்றனர். தொடர்ந்து, சென்னை சைதாப்பேட்டை எம்.சி. ராஜா கல்லூரி மாணவா் விடுதி வளாகத்தில் ரூ. 44 கோடியே 50 லட்சத்தில் தரை மற்றும் 10 தளங்களுடன் 484 மாணவா்கள் தங்கும் வசதியுடன் கட்டப்பட்டுள்ள ஆதிதிராவிடா் மற்றும் பழங்குடியின கல்லூரி மாணவா்களுக்கான புதிய விடுதிக் கட்டடத்தை முதல்வா் மு.க.ஸ்டாலின் திறந்துவைத்தார்.