ஆம்ஸ்ட்ராங் கொலையில் நெல்லை ரவுடிக்கு தொடர்பு இல்லை - எஸ்பி விளக்கம்

சென்னை போலீசாரால் தேடப்பட்ட பிரபல ரவுடி நெல்லையில் கைது செய்யப்பட்டார். அவருக்கும் ஆம்ஸ்ட்ராங் கொலை வழக்கிற்கும், எந்த தொடர்பும் இல்லை’’ என்று நெல்லை மாவட்ட எஸ்பி சிலம்பரசன் தெரிவித்தார்.

நெல்லை மாவட்டம் வீரவநல்லூர் மின்வாரிய அலுவலகம் பின்புறம் உள்ள அய்யா கோவில் தெருவைச் சேர்ந்தவர் முத்து மாரியப்பன். இவருடைய மகன் வைரமணி (25).சென்னையில் வசித்து வந்த இவர் சமீபத்தில் தனது சொந்த ஊரான வீரவநல்லூருக்கு வந்தார். இந்த நிலையில் வைரமணி, ஒரு தொழிலாளியிடம் பணம் கேட்டு மிரட்டியதாக, அவரை நேற்று முன்தினம் இரவு வீரவநல்லூர் போலீசார் கைது செய்தனர். தொடர்ந்து அவரிடம் போலீசார் தீவிர விசாரணை நடத்தினர். இதில் பல்வேறு திடுக்கிடும் தகவல்கள் வெளியாகின.

அதாவது, சென்னையில் பிரபல ரவுடியாக வலம் வந்த வைரமணி, கடந்த ஆண்டு கொலை செய்யப்பட்ட ஆற்காடு சுரேஷின் கூட்டாளி என்று கூறப்படுகிறது. இவர் மீது சென்னை மரக்காணம், வில்லிவாக்கம் உள்ளிட்ட போலீஸ் நிலையங்களில் கொலை உள்ளிட்ட பல்வேறு வழக்குகள் நிலுவையில் உள்ளன. எனவே, அவரது பெயரை ரவுடி பட்டியலில் சேர்த்து போலீசார் தீவிரமாக கண்காணித்து வந்தனர்.

ஆற்காடு சுரேஷின் கூட்டாளிகள் சமீபத்தில் பகுஜன் சமாஜ் கட்சியின் மாநில தலைவர் ஆம்ஸ்ட்ராங்கை கொடூரமாக கொலை செய்தனர். இந்த வழக்கு தொடர்பாக பலர் அதிரடியாக கைது செய்யப்பட்டனர். ஒருவர் என்கவுண்ட்டரில் சுட்டுக்கொல்லப்பட்டர். இந்த நிலையில் சொந்த ஊருக்கு வந்து பதுங்கியிருந்த வைரமணி கைது செய்யப்பட்டு உள்ளார்.

இதுதொடர்பாக நெல்லை மாவட்ட எஸ்பி சிலம்பரசன் கூறுகையில், ‘‘ஆம்ஸ்ட்ராங் கொலை வழக்கிற்கும், தற்போது கைது செய்யப்பட்டுள்ள வைரமணிக்கும் எந்த தொடர்பும் இல்லை’’ என்று தெரிவித்தார்.