நெல்லையில் 3 பள்ளி சத்துணவு மையங்களுக்கு ஐஎஸ்ஓ தரச்சான்று: ஆட்சியர் வழங்கினார்!

நெல்லையில் 3 பள்ளி சத்துணவு மையங்களுக்கு பெறப்பட்ட ஐஎஸ்ஓ தரச்சான்றிதழினை சத்துணவு அமைப்பாளர்களுக்கு மாவட்ட ஆட்சியர் கார்த்திகேயன், வழங்கினார்.

திருநெல்வேலி மாவட்டம், சமூகநலன் மற்றும் மகளிர் உரிமைத்துறையில் புரட்சித்தலைவர் எம்.ஜி.ஆர். சத்துணவுத் திட்டத்தின் கீழ் செயல்படும் பள்ளி சத்துணவு மையங்களில் ஐஎஸ்ஓ 9001-2015 தரச்சான்று வழங்குவதற்காக மூன்று பள்ளி சத்துணவு மையங்கள் தேர்வு செய்யப்பட்டுள்ளது. சேரன்மகாதேவி ஊராட்சி ஒன்றியம், சேரன்மகாதேவி, ஊராட்சி ஒன்றிய துவக்கப்பள்ளி, இராதாபுரம்; ஊராட்சி ஒன்றியம், திசையன்விளை ஸ்ரீ ராமகிருஷ்ணா துவக்கப் பள்ளி, மற்றும் திருநெல்வேலி மாநகராட்சிக்கு உட்பட்ட பெருமாள்புரம் துவக்கப் பள்ளி ஆகிய மூன்று பள்ளி சத்துணவு மையங்களுக்கும் ஐஎஸ்ஓ 9001-2015 தரச்சான்று சென்னை நிறுவனத்தின் மூலம் பெறப்பட்டுள்ளது. 

சான்றிதழ்களை மாவட்ட ஆட்சித் தலைவர் கார்த்திகேயன் சம்பந்தப்பட்ட பள்ளி சத்துணவு அமைப்பாளர்களுக்கு வழங்கினார். ஏற்கனவே திருநெல்வேலி மாநகராட்சியில் உள்ள முதலமைச்சரின் காலை உணவு திட்ட சமையல் கூடத்திற்கு ஐஎஸ்ஓ தரச்சான்று பெறப்பட்டுள்ளது குறிப்பிடத்தக்கது. நிகழ்ச்சியில் உதவி ஆட்சியர் (பயிற்சி) கிஷன் குமார்.சீ., மாவட்ட ஆட்சியரின் நேர்முக உதவியாளர்(சத்துணவு), திருநெல்வேலி மாநகராட்சி உதவி ஆணையர், மற்றும் சம்பந்தப்பட்ட வட்டார வளர்ச்சி அலுவலர்கள்; கலந்து கொண்டார்கள்.