» செய்திகள் - விளையாட்டு » உலகம்

இந்தியா வருவதை தள்ளிவைத்த நிலையில் சீனாவுக்கு எலான் மஸ்க் திடீர் பயணம்!

திங்கள் 29, ஏப்ரல் 2024 9:04:39 AM (IST)

இந்தியா பயணத்தை தள்ளிவைத்த நிலையில் எலான் மஸ்க் திடீர் பயணமாக சீனா சென்றுள்ளார்.

உலக பணக்காரர்களில் ஒருவரும் பிரபல தொழிலதிபருமானவர் எலான் மஸ்க். மின்சார வாகனங்கள் தயாரிப்பு நிறுவனமான டெஸ்லா, தனியார் விண்வெளி ஆய்வு நிறுவனமான ஸ்பெஸ் எக்ஸ், ஸ்டார்லிங்க் போன்ற பல்வேறு நிறுவனங்களின் சொந்தக்காரரான இவர், பிரபல சமூக வலைத்தளமான எக்ஸ் தளத்தின் அதிபராகவும் விளங்குகிறார்.

இந்தியா உள்பட பல்வேறு நாடுகளில் இவர் தன்னுடைய தொழில் நிறுவனங்களை தொடங்க ஆர்வம் காட்டி வரும்நிலையில் கடந்த வாரம் எலான் மஸ்க் இந்தியா வருவதாக கூறப்பட்டது. இந்தியாவில் டெஸ்லா நிறுவனத்தின் முதலீடு மற்றும் ஸ்டார்லிங்க் குறித்தான அறிவிப்புகளுடன் இவருடைய இந்திய பயணம் அமையும் எனவும் இந்தப்பயணத்தில் பிரதமர் மோடியையும் சந்தித்து அவர் பேச்சுவார்த்தை நடத்துவார் என கூறப்பட்டது. 

இதனால் நாட்டின் பொருளாதாரமும் வேலைவாய்ப்பும் பெருமளவு அதிகரிக்கும் என பேசப்பட்டது. எலான் மஸ்க்கின் இந்திய பயணம் பெரிதும் எதிர்பார்க்கப்பட்ட ஒன்றாக இருந்த நிலையில் அவரின் இந்திய பயணம் திடீரென தள்ளி வைக்கப்பட்டது. இதுகுறித்து எக்ஸ் தளத்தில் அவர் கூறியதாவது, "முக்கிய அலுவல்கள் காரணமாக இந்தியா பயணத்தை தாமதப்படுத்த வேண்டியதாகிவிட்டது. இந்தாண்டு (2024) இறுதிக்குள் கண்டிப்பாக இந்தியா வருவதை ஆவலுடன் எதிர்ப்பார்க்கிறேன்” என்றார்.

இந்தநிலையில் டெஸ்லா அதிபர் எலான் மஸ்க் திடீர் பயணமாக நேற்று சீனா சென்றார். தன்னுடைய சொந்த ஜெட் விமானம் மூலம் பீஜிங் சென்றுள்ள அவரை சீன அதிகாரிகள், தொழிலதிபர்கள் ஆகியோர் வரவேற்றனர். ஏற்கனவே சீனாவில் டெஸ்லா நிறுவனம் தன்னுடைய விற்பனையை தொடங்கிய நிலையில் தானியங்கி கார்களுக்கான மேம்படுத்தப்பட்ட மென்பொருளை அவர் அறிமுகப்படுத்த உள்ளதாக தகவல்கள் வெளியாகி உள்ளன. இந்தியா பயணத்தை தள்ளிவைத்த மறுவாரமே மின்சார வாகன சந்தையில் 2-ம் இடத்தில் உள்ள சீனாவுக்கு எலான் மஸ்க் சென்றுள்ளது குறிப்பிடத்தக்கது.


மக்கள் கருத்து


மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.



மேலும் தொடரும் செய்திகள்

Sponsored Ads




Arputham Hospital






Thoothukudi Business Directory