கேரளாவில் 10 ஆண்டுக்குப் பின் காங்கிரஸ் ஆட்சி: புதிய முதல்வராக வி.டி.சதீசன் பதவியேற்பு!

தலைநகர் திருவனந்தபுரத்தில் உள்ள சென்ட்ரல் ஸ்டேடியத்தில் இன்று (திங்கட்கிழமை) காலை 10:15 மணியளவில் பதவியேற்பு விழா மிக எழுச்சியுடன் தொடங்கியது. விழா மேடையில் ‘வந்தே மாதரம்’ பாடல் இசைக்கப்பட்டதைத் தொடர்ந்து, மாண்புமிகு கேரள மாநில ஆளுநர் திரு. ராஜேந்திர விஸ்வநாத் அர்லேகர் அவர்கள், புதிய முதல்வர் வி.டி.சதீசனுக்குப் பதவிப் பிரமாணமும், ரகசியக் காப்புப் பிரமாணமும் செய்து வைத்தார். 

கடவுளின் பெயரால் வி.டி.சதீசன் முதலமைச்சராகப் பிரமாணம் எடுத்தபோது மைதானத்தில் திரண்டிருந்த ஆயிரக்கணக்கான தொண்டர்கள் ஆரவாரம் செய்து தங்களது மகிழ்ச்சியை வெளிப்படுத்தினர். இதனைத் தொடர்ந்து தேசிய கீதம் இசைக்கப்பட்டு விழா நிறைவுற்றது.

முதலமைச்சர் வி.டி.சதீசனைத் தொடர்ந்து, அவரது அமைச்சரவையில் இடம் பெற்றுள்ள 20 புதிய அமைச்சர்களும் வரிசையாகப் பதவிப் பிரமாணம் எடுத்துக் கொண்டனர். புதிய அமைச்சரவையில் காங்கிரஸ் கட்சியைச் சேர்ந்த 11 சட்டப்பேரவை உறுப்பினர்கள், முக்கியக் கூட்டணி கட்சியான இந்திய யூனியன் முஸ்லிம் லீக் கட்சியின் 5 சட்டப்பேரவை உறுப்பினர்கள் மற்றும் ஆர்.எஸ்.பி., சி.எம்.பி. ஆகிய கூட்டணிக் கட்சிகளின் பிரதிநிதிகளும் அமைச்சர்களாகப் பதவியேற்றனர். 

இதில் ரமேஷ் சென்னிதலா, கே.முரளீதரன், பி.கே.குஞ்ஞாலிக்குட்டி போன்ற மூத்த தலைவர்களுடன் சேர்த்து மொத்தம் 14 புதுமுகங்களுக்கு இந்த அமைச்சரவையில் வாய்ப்பு அளிக்கப்பட்டுள்ளது குறிப்பிடத்தக்கது.

பதவியேற்பு விழாவில் அகில இந்தியக் காங்கிரஸ் கமிட்டித் தலைவர் மல்லிகார்ஜுன கார்கே, மக்களவை எதிர்க்கட்சித் தலைவர் ராகுல் காந்தி, வயநாடு நாடாளுமன்ற உறுப்பினர் திருமதி. பிரியங்கா காந்தி, ஏஐசிசி பொதுச்செயலாளர் கே.சி.வேணுகோபால் ஆகியோர் நேரில் பங்கேற்றனர். மேலும், காங்கிரஸ் ஆளும் மாநிலங்களான கர்நாடக முதல்வர் சித்தராமையா, துணை முதல்வர் டி.கே.சிவகுமார், தெலங்கானா முதல்வர் ரேவந்த் ரெட்டி, இமாச்சலப் பிரதேச முதல்வர் சுக்விந்தர் சிங் சுகு ஆகியோரும் கலந்துகொண்டனர்.

இவர்களுடன், பதவியை நிறைவு செய்யும் கேரள முன்னாள் முதல்வர் பினராயி விஜயன், மார்க்சிஸ்ட் கம்யூனிஸ்ட் கட்சியின் அகில இந்தியத் தலைவர்கள் மற்றும் கேரள மாநில பாஜக சட்டமன்ற உறுப்பினர் விபரங்களுடன் ஏராளமான அரசியல் பிரமுகர்களும், தொண்டர்களும் இந்த விழாவில் பெருந்திரளாகப் பங்கேற்றனர். புதியதாகப் பொறுப்பேற்றுள்ள வி.டி.சதீசன் தலைமையிலான அரசுக்கு பாரதப் பிரதமர் நரேந்திர மோடி அவர்கள் தனது வாழ்த்துக்களைத் தெரிவித்துள்ளார்.