கேரளத்தில் 20 ஆண்டுகளாக தலைமறைவாக இருந்த 100-க்கும் மேற்பட்ட குற்றவாளிகள் கைது!

கேரள மாநிலம் திருச்சூர் கிராமப்புற காவல் துறையினர் நடத்திய ‘ஆபரேஷன் அயன் கிரிப்’ என்ற அதிரடி வேட்டையில், நீதிமன்றத்தால் தண்டனை விதிக்கப்பட்டு பல ஆண்டுகளாகத் தலைமறைவாக இருந்த 100-க்கும் மேற்பட்ட குற்றவாளிகள் கைது செய்யப்பட்டுள்ளனர்.

திருச்சூர் கிராமப்புற மாவட்ட காவல் கண்காணிப்பாளர் பி. கிருஷ்ணகுமார் தலைமையில் இந்தச் சிறப்புச் சோதனை நடத்தப்பட்டது. இதில் பிடிபட்டவர்களில் பலர் 2001, 2007 மற்றும் 2009-ஆம் ஆண்டுகளில் நீதிமன்றத்தால் தண்டனை விதிக்கப்பட்டவர்கள். குறிப்பாக, இரண்டு தசாப்தங்களுக்கும் மேலாக (20 ஆண்டுகள்) போலீசாரின் கண்ணில் மண்ணைத் தூவிவிட்டு தலைமறைவாக இருந்தவர்களும் இந்த நடவடிக்கையில் சிக்கியுள்ளனர்.

கைது செய்யப்பட்டவர்கள் மீது பல்வேறு காலகட்டங்களில் (2001, 2007, 2009 மற்றும் 2015) சிறு குற்றங்கள் மற்றும் 2000 முதல் 2018 வரை பதிவான செக் மோசடி வழக்குகள் தொடர்பாக நீதிமன்றங்களால் பிணையில் வரமுடியாத வாரண்டுகள் பிறப்பிக்கப்பட்டிருந்தன.

பல்வேறு இடங்களில் பதுங்கியிருந்த இவர்களைப் பிடிக்கத் தனிப்படை அமைக்கப்பட்டு, தீவிர தேடுதல் வேட்டைக்குப் பிறகு அவர்கள் அனைவரும் கைது செய்யப்பட்டு அந்தந்த நீதிமன்றங்களில் ஆஜர்ப்படுத்தப்பட்டனர். பின்னர் அவர்கள் சிறை தண்டனைக்காக சிறையில் அடைக்கப்பட்டனர்.

இது குறித்து மாவட்ட காவல் கண்காணிப்பாளர் பி. கிருஷ்ணகுமார் விடுத்துள்ள அறிக்கையில் கூறியிருப்பதாவது: "சமூகத்தின் அமைதியைக் கெடுப்பவர்கள் மற்றும் சட்டத்தை மதிக்காமல் தலைமறைவாக இருப்பவர்கள் மீது வரும் நாட்களிலும் கடுமையான நடவடிக்கை தொடரும். ரவுடியிசத்தைத் தடுக்கவும், நீதிமன்ற வாரண்டுகளை மதிக்காமல் ஒளிந்து கொண்டிருப்பவர்களை நீதியின் முன் நிறுத்தவும் 'ஆபரேஷன் அயன் கிரிப்' போன்ற சிறப்புச் சோதனைகள் தொடர்ந்து முன்னெடுக்கப்படும்.

மேலும், குற்றவாளிகளுக்கு அடைக்கலம் கொடுப்பவர்கள் மற்றும் அவர்கள் தலைமறைவாக இருக்க உதவுபவர்கள் மீதும் கடும் சட்ட நடவடிக்கை எடுக்கப்படும்" என்று தெரிவித்துள்ளார்.