பீகார் அரசியலில் அதிரடி திருப்பம்: ராஜினாமா முடிவில் முதல்வர் நிதிஷ் குமார்?

பீகார் அரசியலில் கடந்த இரு தசாப்தங்களாக அசைக்க முடியாத சக்தியாகத் திகழ்ந்த நிதிஷ் குமார், தனது முதலமைச்சர் பதவியைத் துறந்து தேசிய அரசியலுக்கு மாற உள்ளதாக வெளியாகி வரும் தகவல்கள் அம்மாநில அரசியலில் பெரும் பரபரப்பை ஏற்படுத்தியுள்ளன.

பீகார் மாநிலத்தைச் சேர்ந்த 5 மாநிலங்களவை உறுப்பினர் இடங்களுக்கான தேர்தல் அறிவிக்கப்பட்டுள்ள நிலையில், இதற்கான வேட்புமனுத் தாக்கல் செய்ய இன்று (மார்ச் 5) கடைசி நாளாகும். இதன்படி, ஐக்கிய ஜனதா தளம் (JDU) சார்பில் முதலமைச்சர் நிதிஷ் குமார் தனது வேட்புமனுவைத் தாக்கல் செய்ய உள்ளதாகக் கட்சி வட்டாரங்கள் தெரிவிக்கின்றன.

இதற்காக மத்திய உள்துறை அமைச்சர் அமித் ஷா இன்று பாட்னா வரவுள்ளார். நிதிஷ் குமார் மற்றும் பாஜக வேட்பாளர்கள் மனுத்தாக்கல் செய்யும் நிகழ்வில் அவர் பங்கேற்பார் என எதிர்பார்க்கப்படுகிறது.

நிதிஷ் குமார் ராஜினாமா செய்யும் பட்சத்தில், பீகாரில் முதன்முறையாக பாஜகவைச் சேர்ந்த ஒருவர் முதலமைச்சராகப் பதவியேற்க வாய்ப்புள்ளது. பாஜகவைச் சேர்ந்த துணை முதல்வர் சாம்ராட் சவுத்ரி அல்லது மத்திய அமைச்சர் நித்யானந்த் ராய் ஆகியோரில் ஒருவருக்கு முதலமைச்சர் பதவி வழங்கப்படலாம் எனப் பலத்த யூகங்கள் நிலவுகின்றன.

நிதிஷ் குமாரின் மகன் நிஷாந்த் குமார் இன்று முறைப்படி அரசியலில் ஈடுபட உள்ளதாகத் தெரிகிறது. அவர் பீகாரின் துணை முதலமைச்சராக நியமிக்கப்பட வாய்ப்புள்ளதாகக் கூறப்படுகிறது. வாரிசு அரசியலைத் தொடர்ந்து எதிர்த்து வந்த நிதிஷ் குமார், தற்போது தனது மகனை முன்னிறுத்துவது அரசியல் நோக்கர்களிடையே விவாதத்தை ஏற்படுத்தியுள்ளது.

10 முறை முதலமைச்சராகப் பதவியேற்று சாதனை படைத்த நிதிஷ் குமார், மாநில அரசியலில் இருந்து விடைபெற்று நாடாளுமன்ற மேலவைக்குச் செல்வது பீகார் அரசியலில் ஒரு புதிய அத்தியாயத்தின் தொடக்கமாகக் கருதப்படுகிறது. நேற்று ஹோலி பண்டிகை தினத்தில் ஜேடியு (JDU) மற்றும் பாஜக தலைவர்களிடையே நடந்த தொடர் ஆலோசனைகளுக்குப் பிறகு இந்த முக்கிய முடிவுகள் எடுக்கப்பட்டுள்ளன. இது குறித்த அதிகாரப்பூர்வ அறிவிப்புகள் இன்று மாலைக்குள் வெளியாகும் என எதிர்பார்க்கப்படுகிறது.