தமிழகத்தில் செட்டில்மென்ட், பாகப்பிரிவினை மற்றும் விடுதலை தொடர்பான பத்திரங்களைக் காகிதமில்லா முறையில் பதிவு செய்யும் புதிய திட்டம், வரும் நவம்பர் 2-ம் தேதி முதல் அமலுக்கு வரும் என்று தமிழக அரசு அதிகாரப்பூர்வமாக அறிவித்துள்ளது.
பொதுமக்கள் சார்-பதிவாளர் அலுவலகங்களுக்கு நேரில் செல்லாமல், வீடு மற்றும் மனை விற்பனைப் பத்திரங்களைப் பதிவு செய்யும் வசதி கடந்த ஆகஸ்ட் 17-ம் தேதி முதல் நடைமுறைக்கு வந்தது.
இதனைத் தொடர்ந்து, தானப்பத்திரம், பாகப்பிரிவினை, விடுதலைப் பத்திரம், தானம் ரத்து ஆகிய நான்கு வகை பத்திரப் பதிவுகளையும் முற்றிலும் 'ஆன்லைன்' காகிதமில்லா முறைக்கு மாற்ற அரசு நடவடிக்கை எடுத்தது. இத் திட்டம் ஏற்கனவே அறிவிக்கப்பட்ட தேதியிலிருந்து மாற்றியமைக்கப்பட்டு, தற்போது இறுதி செய்யப்பட்டுள்ளது.
இப் புதிய திட்டத்திற்கான கணினி மென்பொருள் வடிவமைக்கும் பணிகள் முழுமையாக நிறைவடைந்துள்ளதைத் தொடர்ந்து, வரும் நவம்பர் 2-ம் தேதி முதல் இச்சேவை அமலுக்கு வரும் எனப் பதிவுத் துறை அறிவித்துள்ளது.
இதற்கான அதிகாரப்பூர்வ அரசாணையைப் பதிவுத் துறைச் செயலர் குமரகுருபரன் பிறப்பித்துள்ளார். பதிவுத் துறையின் நவீனமயமாக்கப்பட்ட ‘ஸ்டார் 3.0’ (STAR 3.0) மென்பொருளில் இக் காகிதமில்லாப் பத்திரப்பதிவுக்கான சிறப்பு வசதிகள் முழுமையாகப் பதிவேற்றம் செய்யப்பட்டுள்ளன.