தூத்துக்குடி மாவட்டம் கழுகுமலை ஆறுமுகநகரைச் சேர்ந்த சேகர் என்பவரது வீட்டில் கடந்த 13.08.2026 அன்று நள்ளிரவு மர்ம நபர்கள் வீட்டின் கதவை உடைத்து உள்ளே புகுந்து தங்க நகைகள் மற்றும் வெள்ளிப் பொருட்களைக் கொள்ளையடித்துச் சென்றனர். இதுகுறித்து சேகர் அளித்த புகாரின் பேரில் கழுகுமலை காவல் துறையினர் வழக்குப் பதிவு செய்து தீவிர விசாரணை மேற்கொண்டு வந்தனர்.
சம்பவ இடத்தில் இருந்த சிசிடிவி கேமரா பதிவுகள் மற்றும் செல்போன் கோபுரத் தொழில்நுட்ப ஆதாரங்களின் அடிப்படையில் போலீசார் தீவிர விசாரணை நடத்தினர். அதில், இத்திருட்டுச் சம்பவத்தில் ஈரோடு மாவட்டத்தைச் சேர்ந்த சுரேஷ் (26) மற்றும் கோயம்புத்தூர் மாவட்டத்தைச் சேர்ந்த தமிழரசன் (30) ஆகிய இருவருக்கும் தொடர்பு இருப்பது உறுதி செய்யப்பட்டது.
இதனையடுத்து இருவரையும் இன்று அதிரடியாகக் கைது செய்த போலீசார், அவர்களிடமிருந்து திருடப்பட்ட 16½ பவுன் தங்க நகைகள் மற்றும் வெள்ளிப் பொருட்களைப் பத்திரமாக மீட்டனர். கைது செய்யப்பட்ட இருவரும் நீதிமன்றத்தில் ஆஜர்படுத்தப்பட்டுச் சிறையில் அடைக்கப்பட்டனர்.