விடுதலைப் போராட்ட வீரர் எஸ்.எஸ். இராமசாமி படையாட்சியாரின் 109-வது பிறந்தநாளை முன்னிட்டு, சென்னை கிண்டியில் உள்ள அவரது திருவுருவச் சிலைக்குப் பா.ஜ.க. தலைவர் நயினார் நாகேந்திரன் மாலை அணிவித்து மரியாதை செலுத்தினார்.
அதன்பின் செய்தியாளர்களைச் சந்தித்து அவர் பேசியதாவது: "தமிழக முதலமைச்சர் விஜய் எதற்காக லண்டன் சென்றுள்ளார் என்பது குறித்த முறையான விளக்கத்தை இதுவரை தமிழக அரசு வெளியிடவில்லை. தொழில் முதலீடுகளை ஈர்ப்பதற்காகச் சென்றிருப்பதாகக் கூறப்பட்டாலும், ஏற்கனவே தமிழகத்தில் இருக்கக்கூடிய முதலீடுகளையே மீண்டும் புதிய முதலீடுகள் போலக் காட்டி வருகின்றனர். உண்மையைக் கூறப்போனால் முதலமைச்சரின் இந்த லண்டன் பயணம் ஒரு தொழில்முறைப் பயணம் அல்ல; அது வெறும் சுற்றுலாப் பயணமே ஆகும்.
மேலும், தலைமைச் செயலகத்தை மாற்றப் போவதாக அரசு அறிவித்துள்ளது. ஆனால், இதற்காக எந்தவொரு இடத்தையும் முன்கூட்டியே தேர்வு செய்யவில்லை; முறையான திட்ட அறிக்கையும் தயார் செய்யப்படவில்லை. தொடக்கத்தில் இத்திட்டத்திற்கு ரூ.1,200 கோடி செலவாகும் என்று அறிவித்துவிட்டு, தற்போது ரூ.2,000 கோடி என உயர்த்திக் கூறுகின்றனர். எவ்வித திட்டமிடலும் இல்லாமல் மக்களின் வரிப் பணத்தை வீணடிக்கும் செயலாகவே இது தெரிகிறது.
நடிகராக இருந்தபோது மீனவர்களின் நண்பனாகத் திரையில் நடித்த விஜய், தற்போது முதலமைச்சராகப் பட்டினப்பாக்கத்தில் தலைமைச் செயலகத்தைக் கொண்டு வருவதன் மூலம், அப்பகுதியில் வசிக்கும் மீனவர்களுக்கு எதிரான நடவடிக்கையில் ஈடுபட்டு வருகிறார். மீனவர்களின் வாழ்வாதாரத்தைப் பாதிக்கும் வகையில் அங்கு தலைமைச் செயலகம் அமைக்கும் முயற்சியை அரசு உடனடியாகக் கைவிட வேண்டும்" என்றார்.