ஈரானுக்கு எதிரான போரில் அமெரிக்க ராணுவம் இதுவரை குறைந்தது 81 போர் விமானங்கள் மற்றும் ட்ரோன்களை இழந்துள்ளதாகவும், இதன் மொத்தச் சேத மதிப்பு சுமார் ரூ.31,680 கோடி (3.8 பில்லியன் டாலர்) என்றும் அமெரிக்க அரசு அமைப்பான 'காங்கிரஷனல் ரிசர்ச் சர்வீஸ்' தெரிவித்துள்ளது.
மேற்காசிய நாடான ஈரான் மீது அமெரிக்கா மற்றும் இஸ்ரேல் படைகள் இணைந்து கடந்த பிப்ரவரி மாத இறுதியில் போரைத் தொடங்கின. இப் போருக்கு ஈரானும் கடுமையான பதிலடி கொடுத்து வருகிறது.
இந்நிலையில், இப் போரில் அமெரிக்க ராணுவத்திற்கு ஏற்பட்டுள்ள வான்படை இழப்புகள் மற்றும் சேதங்கள் குறித்த புதிய அதிகாரப்பூர்வ அறிக்கையை அந்நாட்டு அரசு நிறுவனமான 'காங்கிரஷனல் ரிசர்ச் சர்வீஸ்' தற்போது வெளியிட்டுள்ளது.
அறிக்கையில் குறிப்பிடப்பட்டுள்ள முக்கிய விவரங்கள்:
எதிரிகளைத் தாக்கி கண்காணிக்கும் திறன் கொண்ட 'எம்.க்யூ-9 ரீப்பர்' (MQ-9 Reaper) ரகத்தைச் சேர்ந்த 45 ட்ரோன்கள் போரில் சுட்டு வீழ்த்தப்பட்டு இழக்கப்பட்டுள்ளன. இது அமெரிக்க வான்படையின் உளவுப் பிரிவைப் பெரிதும் பாதித்துள்ளது.
'எஃப்-15' (F-15) ரகத்தைச் சேர்ந்த 12 போர் விமானங்கள் மற்றும் எதிரியின் ரேடார்களில் சிக்காமல் மறைந்து தாக்கும் அதிநவீன 'எஃப்-35' (F-35) ரகப் போர் விமானம் ஒன்றும் சேதமடைந்துள்ளன.
இது தவிர, 'இ-3 சென்ட்ரி' (E-3 Sentry) ரக வான்வழி கண்காணிப்பு விமானம் ஒன்று மற்றும் போர் தேடல்-மீட்பு ஹெலிகாப்டர்களும் சேதமடைந்துள்ளன.
ஒரு 'எஃப்-15' போர் விமானத்தின் மதிப்பு ₹288 கோடியாகவும், 'எம்.க்யூ-9' ரீப்பர் ட்ரோன் ஒன்றின் மதிப்பு ₹480 கோடியாகவும் கணக்கிடப்பட்டுள்ளது. குறிப்பாக, அதிநவீன 'எஃப்-35' விமானத்தின் மதிப்பு ₹883 கோடிக்கும் அதிகமாகும்.
இதன்படி, ஒட்டுமொத்தமாக அமெரிக்கா இழந்துள்ள ராணுவ விமானங்கள் மற்றும் ட்ரோன்களின் இழப்பீடு மற்றும் சேத மதிப்பு கிட்டத்தட்ட ₹31,680 கோடி எட்டியுள்ளதாக அந்த அறிக்கையில் சுட்டிக்காட்டப்பட்டுள்ளது.