தென்காசி மாவட்டம் சங்கரன்கோவிலிருந்து ராஜபாளையம் செல்லும் சாலையில் உள்ள சுண்டலம்பட்டியில் இருந்து இன்று காலை நெல்லை நோக்கி அரசுப் பேருந்து (TNSTC) ஒன்று புறப்பட்டுச் சென்றது. இப்பேருந்தை நெல்லை புதுப்பேட்டையைச் சேர்ந்த டிரைவர் உடையார்ப்பட்டி மாரியப்பன் என்பவர் ஓட்டி வந்தார். நடத்துனராகக் சுண்டலம்பட்டியைச் சேர்ந்த முருகன் இருந்தார். பேருந்தில் சுமார் 50 பயணிகள் பயணம் செய்தனர்.
பேருந்து சுண்டலம்பட்டியில் இருந்து நெல்லை நோக்கிச் சென்றுகொண்டிருந்தபோது, எதிர்பாராதவிதமாகப் பேருந்தின் முன்பகுதியில் உள்ள எஞ்சினிலிருந்து திடீரெனப் புகை வரத் தொடங்கியது. இதைக் கவனித்த ஓட்டுநர் மாரியப்பன், உடனடியாகச் சமயோசிதமாகச் செயல்பட்டுப் பேருந்தைச் சாலையோரமாக நிறுத்தினார்.
மேலும், பேருந்தின் முன்பகுதியில் தீப்பிடிக்கத் தொடங்கியதை அறிந்ததும், உடனடியாகச் செயல்பட்டுப் பேருந்திலிருந்த 50 பயணிகளையும் விரைவாக வெளியேறச் செய்தார். பயணிகள் அனைவரும் கீழே இறங்கிய சில நிமிடங்களிலேயே தீ பேருந்து முழுவதும் வேகமாகப் பரவி, பேருந்து தீப்பற்றி எரியத் தொடங்கியது.
இது குறித்துத் தகவலறிந்து சம்பவ இடத்திற்கு விரைந்து வந்த சங்கரன்கோவில் தீயணைப்புத் துறையினர், போராடித் தீயை அடித்தும் அணைத்தனர். இருப்பினும் பேருந்து முற்றிலும் எரிந்து சாம்பலானது.
ஓட்டுநரின் துரிதமான நடவடிக்கையால் 50 பயணிகள் நல்வாய்ப்பாக உயிர் தப்பிய சம்பவம் அப்பகுதியில் நெகிழ்ச்சியையும் பரபரப்பையும் ஏற்படுத்தியுள்ளது. இச்சம்பவம் குறித்துச் சங்கரன்கோவில் காவல்துறையினர் வழக்குப் பதிவு செய்து தீவிர விசாரணை நடத்தி வருகின்றனர்.