விஜயதசமி மற்றும் பூஜா விடுமுறை முடிந்து சென்னை திரும்பும் பயணிகளின் வசதிக்காக இயக்கப்படும் திருவனந்தபுரம் வடக்கு – தாம்பரம் வாராந்திர சிறப்பு ரயிலுக்கு (06164 / 06163) பல முக்கிய நிலையங்களில் நிறுத்தங்கள் வழங்கப்படவில்லை.
விஜயதசமி மற்றும் பூஜா விடுமுறை முடிந்து சென்னை திரும்பும் பொதுமக்கள், மாணவர்கள் மற்றும் பணியாளர்களின் நலனைக் கருத்தில் கொண்டு, தெற்கு ரயில்வே சார்பில் திருவனந்தபுரம் வடக்கு – தாம்பரம் வாராந்திர சிறப்பு ரயில் (வண்டி எண்: 06164 / 06163 - நாகர்கோவில் டவுன் வழியாக) அறிமுகப்படுத்தப்பட்டு இயக்கப்பட்டு வருகிறது.
இந்தச் சிறப்பு ரயில் சேவைக்கு பயணிகள் மத்தியில் பலத்த வரவேற்பு கிடைத்துள்ள போதிலும், திருவனந்தபுரம் - நாகர்கோவில் மற்றும் நாகர்கோவில் - திருநெல்வேலி வழித்தடங்களில் உள்ள பல முக்கிய ரயில் நிலையங்களில் இந்த ரயிலுக்கு நிறுத்தங்கள் வழங்கப்படவில்லை என்பது பெரும் அதிர்ச்சியை ஏற்படுத்தியுள்ளது.
குறிப்பாக, திருவனந்தபுரம் – நாகர்கோவில் பகுதியில் நெய்யாற்றின்கரை (Neyyattinkara), குழித்துறை (Kulitturai), இரணியல் (Eraniel) ரயில் நிலையங்களிலும், நாகர்கோவில் – திருநெல்வேலி பகுதியில் ஆரல்வாய்மொழி (Aralvaimozhi) ரயில் நிலையங்களிலும் நிறுத்தங்கள் தவிர்க்கப்பட்டுள்ளன.
மேற்கண்ட ரயில் நிலையங்கள் அனைத்தும் தினமும் ஆயிரக்கணக்கான கிராமப்புற மற்றும் புறநகர் பகுதிகளைச் சேர்ந்த பயணிகள், வியாபாரிகள், அரசு ஊழியர்கள் மற்றும் கல்லூரி மாணவர்களால் அதிகம் பயன்படுத்தப்படும் முக்கிய மையங்களாகும். இங்கு நிறுத்தங்கள் இல்லாததால், சுற்றியுள்ள கிராமப்புறங்களைச் சேர்ந்த பயணிகள் நீண்ட தூரம் பயணித்து நாகர்கோவில் அல்லது பிற முக்கிய நிலையங்களுக்குச் சென்றுதான் ரயிலில் ஏற வேண்டிய கட்டாயத்திற்குத் தள்ளப்பட்டுள்ளனர்.
எனவே, பொதுமக்களின் நலன் மற்றும் பயணிகளின் சிரமத்தைக் கருத்தில் கொண்டு, திருவனந்தபுரம் வடக்கு – தாம்பரம் சிறப்பு ரயிலுக்கு நெய்யாற்றின்கரை, குழித்துறை, இரணியல், ஆரல்வாய்மொழி மற்றும் நாங்குநேரி ஆகிய ரயில் நிலையங்களில் உடனடியாக வணிக ரீதியிலான அல்லது பரிசோதனை அடிப்படையிலான நிறுத்தங்களை வழங்கத் தெற்கு ரயில்வே நிர்வாகம் நடவடிக்கை எடுக்க வேண்டும் எனப் பயணிகள் சங்கங்கள் மற்றும் பொதுமக்கள் தரப்பில் கோரிக்கை விடுக்கப்பட்டுள்ளது.